كود سبور//

واصل النادي المكناسي المستوى ديال المزيان اللي لعب به فالماتشات الاخيرة، وقدر يربح فريق الدفاع الحسني الجديدي، اليوم الجمعة فتيران الحسني الثاني بمدينة فاس، برسم الدورة 10 من البطولة الاحترافية.

وسالا الماتش بين النادي المكناسي والدفاع الحسني الجديدي بنتيجة 3 لزيزو، وماركا أهداف الكوديم كل من محسن ربجة فالدقيقة 18، وأنس المهراوي فالدقيقة 29، وإسماعيل محارب 78.

وبهذا الرباح قدرو الكوديم ياخدو 3 بوان مهمة، طلعو بها مؤقتا إلى المركز 7 برصيد 13 نقطة، أما الدفاع الحسني الجديدي فالفريق يحتل مؤقتا المركز 6 برصيد 14 نقط.

وديما مع ماتشات البطولة وعن نفس الدورة، مع سالا ماتش السوالم والضيف ديالو الفتح الرياضي بنتيجة التعادل الايجابي واحد لواحد فتيران برشيد، هدف السوالم ماركاه كريم لگروش فالدقيقة 5، والفتح ماركا لهم أمين لمسن فالدقيقة 26 من بينالتي.

وخداو الفريقين نقطة واحد لكل واحد فيهم بهذا التعادل، والسوالم محتلين المركز 10 مؤقتا برصيد 11 نقطة، والفتح محتلين المركز 11 برصيد 12 نقطة.