گود سبور//

حقق الرجاء الرياضي رباح مهم وصعيب بدا به البطولة الاحترافية، اليوم السبت على نهضة الزمامرة فمركب محمد الخامس بالدار البيضاء ضمن الدورة الثانية.

وسالا الماتش بين الرجاء الرياضي ونهضة الزمامرة بنتيجة واحد لزيرو لمصلحة الفريق الأخضر، وهو الهدف اللي ماركاه عثمان الشرايبي فالدقيقة 37، وقدرو الرجا يبقاو محافظين عليه، واخا هذه المهمة ما كانتش سهلة ضد الزمامرة، اللي حرجو الرجا وسط دونور وقدام جمهورهم، وتعاضو معاهم على وسط التيران، وحتى فالهجمات كانو صعاب، ولولا استماتة دفاع الخضرا والگول لحرار كانو الدكاليين يماركيو التعدل على الاقل، مقابل غياب اللمسة الأخيرة عند هجوم الرجا، اللي حتى هو ضيع فرص لقتل الماتش بهدف ثاني.

وبهذه النتيجة خداو الرجاء الرياضي ثلاث نقاط بداو بها الموسم الجديد، ومحتلين بها المركز السادس مؤقتا مع ماتش مؤجل عن الدورة الاولى ضد الجيش الملكي، أما نهضة الزمامرة محتلين المركز 15 بصفر نقطة.