گود سبور//

حقق الرجاء الرياضي رباح كأس مهم على اولمبيك اسفي اليوم السبت فستاد دونور ضمن الدورة 15 من البطولة الاحترافية، وهو الرباح اللي خلى الفريق فالصدارة واخا مؤقتا.

وسالا الماتش بين الرجاء الرياضي وأولمبيك اسفي بنتيجة 2-0 لصلحة الفريق الأخضر، وماركا له الهدف الاول عبد الله خفيفي فالدقيقة 13، وكان بدر بانون يقدر يزيد الهدف الثاني ولكن زگل بينالتي فالدقيقة 41، مع العلم ان اولمبيك اسفي بقاو لعبين ناقصين من دقيقة 27، بعد طرد سفيان المودن، اما الهدف الثاني ديال الرجا ماركاه محمد بولكسوت فالدقيقة 77.

هذه النتيجة خلات الرجاء الرياضي ياخدو 3 نقاط مهمة، رفع بها الفريق الرصيد ديالو إلى 30 نقطة، وبعد بالصدارة مؤقتا في انتظار اجراء الماتشات  المؤجلين ديال باقي المنافسين، اما اولمبيك اسفي فتعقدت الأمور عند الفريق اللي محتل المركز الاخير بسبعة نقاط مع 3 الماتشات مؤجلين.

وديما عن نفس الدورة 15، ونفس التوقيت، ربحو المغربي الفاسي اولمبيك الدشيرة فأكادير بنتيجة 2 لزيرو، رفعو الماص رصيدهم إلى 27 نقطة ومحتلين المركز الثاني مؤقتا مع 2 ماتشات مؤجلين، اما اولمبيك الدشيرة بقات عندهم 16 نقطة ومحتلين المركز 8 مع ماتش مؤجلين.

الجيش الملكي طاحو ففخ التعادل السلبي مع نهضة الزمامرة فالزمامرة، وولات عند ليفار 26 نقطة ومحتلين المركز الثالث مؤقتا مع 3 الماتشات مؤجلين، اما الفريق الدكالي ولات عندو 13 نقطة ومحتل المركز 14 مع ماتش مؤجل.

ونجحو الكوكب المراكشي وربحو الضيوف ديالهم حسنية اكادير فمراكش بنتيجة 2-0 لزيرو، وولات عند الكوكب 15 نقطة ومحتلين المركز 10 مع ماتش مؤجل، والحسنية بقات عندهم 15 نقطة ومحتلين المركز 9.