وكالات//

توفّى الممثل الأمريكي بات فين، المعروف بالأدوار ديالو فمسلسلات مشهورة بحال Friends وSeinfeld  وThe Middle، عن عمر 60 عام، فدارو فمدينة لوس أنجلوس نهار الاثنين، من بعد صراع مع مرض السرطان اللي بدا معاه من عام 2022، حسب وسائل إعلام أمريكية.

وعائلتو خرجات ببيان فمواقع التواصل الاجتماعي قالت فيه: “بات ما كانش غريب على حتى واحد، كان عندو صحاب مازال ما تعرّفش عليهم. عاش حياتو كلها بالفرح والحيوية”.

بدا بات فين المسيرة التلفزيونية ديالو فبرنامج The George Wendt Show عام 1995، ومن بعد شارك بدور متكرر فمسلسل Murphy Brown ما بين 1995 و1997. وفـ1998 بان فمسلسل Seinfeld فدورJoe Mayo، منظم الحفلات اللي كان معروف كيوزّع المهام الصعيبة على الضيوف.

وكمل كيطلع كضيف شرف فبرامج معروفة فآخر التسعينات وبداية الألفينات، بحال The King of Queens وFriends وThat ’70s Show وHouse.

وحقق شهرة كبيرة بدورو فمسلسل The Middle فشخصية Bill Norwood، اللي تواصل لمدة ثمانية ديال المواسم ما بين 2011 و2018.

وشارك حتى فبعض الأفلام بحال It’s Complicated (2009) وSanta Paws 2:The Santa Pups (2012). وبجانب التمثيل، كان بات فين ممثل ارتجالي، وكيقرّي فجامعة كولورادو كأستاذ مساعد، وكان عضو ففرقة ارتجالية سميتها Bear Shark Mice.