كود سبور//

كيعاني جمال بنصديق البطل المغربي فالكيك بوكسينگ من مرض السرطان، ودار بسبابو عملية جراحية فبلجيكا بعدما رجع له المرض اللي كيتعالج منو لسنوات هادي، وكان عندو أمل باش يلعب الجائزة الكبرى فالگلوري وما كتابش له يشارك فيها، مع العلم أنه كان حاضر فالأطوار ديالها السبت للي فات، باش يشجع المغربي نبيل خشاب ضد الهولندي ريكو هوفنهايم وضارب مع الهولندي حيث استفز الطاقم التقني ديال خشاب.

وكشف رمزي أدارازي وكيل أعمال جمال بنصديق فتصريح لجريدة تيليگراف الهولندية، أن البطل المغربي مول 33 عام دار عملية جراحية فالعنق ديالو بسبب السرطان اللي عندو فالغدة الدرقية وكيعاني معه من 2012، وقال: “انتشر السرطان فالرقبة ديالو وكانت العملية طويلة مدتها 5 السوايع ولكن كلشي داز مزيان واخا مازال تحت الرعاية الطبية حتى يدير التحاليل، وراه غامر حيث عطل العملية الجراحية”.

وكمل وكيل أعمال بنصديق: “كان باغي يشارك فالبطولة ديال الگلوري للجائزة الكبرى، وكان خاصو يدير العملية قبل 8 فبراير وهذا الشي دوينا فيه مع الطاقم الطبي اللي كيداوي فيه 12 عام هادي، كان عندو أمل باش يلعب البطولة ولكن للأسف ما لعبش وقرر يدير العملية يوم 12 مارس”.

نفس المصدر وضح أن جمال بنصديق كان كيتعايش مع السرطان وفنفس الوقت كيتدرب فتايلاند باش يرجع يلعب بعدما ترفع عليه عقوبة التوقيف لمدة 15 شهر، واللي صادرة فحقو بسبب المنشطات.