محمد سقراط-كود///
عندي جوج بطاقات بنكية وحدة للشراء من الأنترنيت وغادي نلغيها حيت مابقى شرا من هاد الضرائب الغير منطقية لي ولاو دابا، والتانية عادية تيري من الكيشي تخلص في المحلات وكدا، الموشكيل هو أنني ف2022 مابقيتش كنبغي نهز الفلوس معايا، جيب عامر وراق والصرف ومرة كيطيحو وخاص تحضي راسك من السرقة مادام كاين بطاقة بنكية من الأحسن ندير أغلب التعاملات ديالي بيها، ولكن للأسف كنلقى أن البطاقة البنكية صالحة فقط في الكيشي وفي الأسواق الكبرى وحتى هي فاش كتبغي تخلص بيها كيبقى بنادم يشوف فيك شي شوفات فشكل داك اللعبة ديال حنا زربانين وراك كتعطلنا، بهاد التبعكيك ديالك، كذلك الأمر في السطاسيونات أو البيسريات، لاكارط غير مستحب الخلاص بيها في المغرب، وكاين أصلا لي مكيتيقش كيخاف يقطعوليه جوج مرات ومشاكل أخرى.
هاد اليوماين مشيت دوزت لافيزيت تيكنيك بغيت نخلص بلاكارط قاليك هوما مادايرينهاش أصلا ماشي بحال حتى محلات خرى كيقوليك كاينة ولكن مافيهاش الريزو، من بعد مشيت دوزت الطبيب حتى هو مكيتخلصش بيها، دزت للصيدلية قاليك كاينة ولكن خاسرة، اذن لاش لايقة هاد الكارط كيشي مادام أن العديد من أصحاب المهن الحرة كيرفضوا يتعاملوا بيها وكيفضلوا الكاش من أجل التهرب الضريبي، تاواحد ماباغي يخلص الضريبة أو الدولة تتبع المداخيل ديالو، كولشي باغي يتعامل بالفلوس كاش وراق بينك وبينو بلا خبار الدولة في آخر العام يديكلاري باش بغى، والدولة تشد في عبو الكحل.
من آفات هاد البلاد الكثيرة إظافة إلى الفساد وتبذير المال العام كاين التهرب الضريبي أو الظلم الضريبي بأصح التعبير، لأن التهرب الضريبي غير متاح للجميع كيمارسوه صحاب المهن الحرة كيتغناو منو بينما الموظف البسيط لي كتقطع ليه الضريبة من المصدر هو لي كيخلص كولشي وهو لي عايش الظلم والحكرة بشتى المستويات من الموظف البسيط حتى للأطر والمدراء، في العديد من دول العالم الكاش غادي وكينقارض كاين بلايص ولاو يكتبوها في باب المطاعم مكنقبلوش الكاش، وكاين مدن ومناطق لي كولشي كتخلصو من تيليفونك بلا حتى لاكارط حتى هي ولات من الماضي وهادشي كيخلي الدولة وتراقب السيولة والتدفقات النقدية، في المغرب حتى فرحنا أننا ولينا نشريو ببطاقة بنكية من المواقع العالمية وهوما يسدو هاد الباب ، وباب أنك تتعامل بالبطاقة البنكية في تعاملاتك اليومية حتى هو شبه مشدود ديما خاصك تيري من الكيشي وتخلص في بلاصة خرى بحال الى باقين في الستينات، وهادشي كيضيع على الدولة ضرائب وفلوس كثيرة.
