كود الرباط//

قال عبد الرحمان رابح، البرلماني عن فريق التجمع الوطني للأحرار، مخاطبا وزير الفلاحة ومدير القرض الفلاحي،  “كاملين كليتو الدلاح ديال شيشاوة بفضل المخطط الأخضر”.

البرلماني رابح عن إقليم شيشاوة، خلال لجنة القطاعات الإنتاجية، هضر على مزايا المخطط الأخضر على الإقليم ديالو، وقال بلي المستوى ديال المعيشة ديال الناس فالقرى تحسن وكاين اكتفاء ذاتي فالإقليم من حيث اللحوم والحليب والخضر واستقرار في البادية.

وأكد البرلماني بلي الاستثمار الزراعي تطور، بحيث قبل المخطط الأخضر كانت مردودية الهكتار الواحد لا تتجاوز 2000 درهم سنويا، الآن المردودية تقدر تجاوز 100 ألف درهم.

البرلماني لي ملم بالفلاحة، قال “كاين تطور مهم بفضل المخطط الأخضر والدعم الفلاحي.

ف الجفاف ديال 1981 كانت الحالة صعبة، راه الوضعية كارثية والدولة اضطرت تقبل مساعدات من الخارج بحيث كانت مساعدة من أمريكا وغيرها ديال الحبوب، في حين دبا مور 5 سنين من الجفاف لم نضطر إلى المساعدة ولا ناخدو عند شي حد والخضرة والسلعة موجودة فالسوق”.

ودافع البرلماني رابح على المخطط الأخضر، في جواب سياسي وتقني على مداخلة فريق الاستقلال للي وصف المخطط بأنه “فيه خلل ومقدرش يوفر القطيع للعيد الكبير”.