كود الرباط//
انتشرت فيديوهات مدعومة من صفحات كثيرة، كلها كذوب ومغالطات حول ملف طلبة الطب، سواء التصريحات الصادرة عن بعض ممثلي الطلبة لي روجو الفايك والكذوب بحال أن الحكومة جابت عرض غاينقص من جودة وفعالية التكوين ديالهم وغيرها.
ولكن للي خطير تجي برلمانية من الحركة الشعبية، وهي بنت الفشوش ومن عائلة غارقا ثروات مالية وباها عندو شي ملف قضائي وحتى هو برلماني من أعيان الحركة الشعبية (غير على هادي خصها تحشم على عراضها)، وتعلن دعمها لهاد الاحتجاجات وتبارطاجي فيديو كله كذوب ودغدغة العواطف.. يعني تحالف غريب من صحاب الشكارة للي على عائلاتهم شبهات كثيرة مع صحاب اللحايا ومالين الكلينيكات ضد هاد الاصلاح المهم فبلادنا.
يلا جيتو وشفتو العرض الحكومي، وشفنا النظام البيداغوجي الجديد لي بغات وزارة التعليم العالي ديرو فكليات الطب والصيدلة بالمغرب، غادي يبان الفرق الكبير بين الشعارات الكاذبة لي كيرفعو بعض ممثلي طلبة الطب وبين حقيقة الأشياء المؤكدة في الوثائق الرسمية.
نبداو أول نقطة، مسار التكوين، حيث غايتم حذف الوقت الميت من هاد المسار وإعادة توزيع الغلاف الزمني بعقلنة وفعالية ومراجعة محتوى التكوين وتعزيز التداريب السريرية من خلال الرفع من الغلاف الزمني ديالها والانفتاح على المحاكاة والتطبيع عن بعد.
نجيو لمدة تكوين فالطب غاتولي 6 سنوات، وعدد ساعات التكوين غايتزاد من 4706 إلى6543 ساعة، منها غايتزاد ساعات التداريب من 2100 ساعة إلى 3765 ساعة، وهادشي مرتبط بالدخول الجامعي 2024/2025.
أما الطلبة القدامى اللي كيتابعو القرايا، كذلك معنيين بهاد النظام الجديد من خلال رفع عدد ساعات التكوين الاجمالي حسب عدد السنوات لي بقات الطالب باش يتخرج، طلبة السنة السادسة عندهم امكانية ياخذو تداريب اضافية من خلال تقديم طلبات الإدارة.
التكوين دبا عرف تغيير، وغايبقا التكوين النظري بنفس الساعات بما يفوق 2500 ساعة ولكن تم النظر فطرق التدريس والمحتويات والأنماط، اما التكوين التطبيقي تزاد ليه التكوين عبر المحاكاة واستعمال تقنيات التطبيب عن بعد.
أما التداريب السريرية غاتعرف زيادة كبيرة من 300 ساعة إلى 600 ساعة من خلال حذف الوقت الميت، بالنسبة للسنة الثالثة والرابعة. ومن 500 ساعة إلى 1000 ساعة من التداريب بالنسبة للسنوات الاخيرة من التدريس.
فيديوهات دارتها وزارة التعليم العالي على النظام البيداغوجي الجديد، كلها تؤكد بلي ممثلي طلبة الطب غالطين بزاف وداخلين فمعركة تكسير العظام ضد هاد الإصلاح الكبير، خاص هادو يفهمو بلي عهد الضغوطات عبر المؤثرين وتحالف صحاب الفلوس مع اللحايا سالا. دبا هذا اصلاح لا تراجع فيه واخا تعياو تكذبو وتروجو الفايك نيوز.
كيفاش وحدة من طلبة الطب مثلا دارت البوز بتصريح اعلامي عامر كذوب، وقالت: “الهدف ديالنا واضح هو التكوين ومبغيناش غير نتخرجو ونبقاو نكزرو فعباد الله.. نحن نطالب بجودة التكوين وخصنا التطبيق..”. دبا العرض الحكومي فيه الرفع من ساعات التكوين وتزيار وادماج تقنيات جديدة ومنع الهروب من المغرب نحو فرنسا.
اللي خلا فدرالية المنعشين تقول بلي خاص اللائحة يكونو فيها حتى الموثقين اللي مشبوهين.
