كود الرباط //

ظاهرة غريبة كيكرسوها شي سياسيين، هي التصاور ويبانو لي هوما لي لي مضويين البلاد. ظاهرة السياسة بالتصاور، تكررت جوج مرات مع بنت البرلماني محمد السيمو، ولي تاهي برلمانية وكيفتخر بها باها وكيقول بلي غادي تهز المشعل، باش بتصاور يمكن.

المرة الأولى فاش تصورات مع الحولي وكتفرقهم على الفقراء، المرة الثانية ف محاولات إطفاء الحرائق، متصور كتبان كتعطي الأوامر، كأنها المنقذ. والحال أن المواطنين العاديين والسلطات لي بدلو مجهود كبير فاطفاء العافية وغامرو بحياتهم ونقذو ما يمكن إنقاذه متصوروش.

البرلمانية السابقة حنان رحاب علقت على الظاهرة وقالت “واحد مشا لأنفكو في عز مأساة وفيات الصغار بالبرد، وتصور كتفرق المانطات،، دوزناها….”

واضافت رحاب “واحدة مشات للأطلس، وتصورت مع أطفال شراتلوم ملابس مستعملة دوزناها..” ، مسترسلة “لكن باش في عز الحرائق، والناس مخلوعة، والديور والغلة مشات.. ووحديين جايببين مصور محترف،.. باش ياخود ليهم صور وفي الخلفية العافية،.. وكيقوموا بحركات زعما راهم هما لي كتوجو  فرق الإنقاذ….”.

وتابعت” في الأخير تلقى لي كيعتبر هادي هي سياسة القرب…”.