أميمة عطية – كود كازا ///

ما سالاتش انتخابات 23 شتنبر فدائرة آنفا بكازا بإعلان النتائج، بحيث دخلات المعركة الانتخابية لمرحلة جديدة من باب الطعن، بعدما تقدم حسن البركاني، وكيل لائحة حزب الاستقلال، بعريضة طعن ضد النتائج، وأرفق الملف بتسجيلات صوتية كتحمل مضامين مرتبطة بأحد أعضاء اللوائح لمرشحة ولي هو طرف فيها ومنافس بدائرة، حسب ما ورد فيها، بلفلوس والوسطاء وحساب الأصوات والتحركات الانتخابية اللي سبقات نهار 23 شتنبر 2026.

“كود” توصلات بتسجيلات صوتية ، بين 8 دقايق ووحدين 3 دقايق قبل نهار الأربعاء 23 شتنبر ومن بعد منو ، بحيث كيدور جزء منها على الفلوس، ولحسابات ديال الصوات والمؤسسات ولبيع وشرا ، وأشخاص كيتوسطو فالتسليم والتنسيق، قبل ما ينتقل الحديث لحساب الأصوات وعدد الناس اللي يمكن يتحركو فهاد العملية.

وحسب ليزابيل لي توصلات بيهم “ كود” ، كان شخص كيقولو ليه “الخال” توسط باش يدوي مع شي حد مسؤول على مؤسسات تعليمية بدائرة انفا وانسق معاه على حسب تفويت الأصوات لصالح حزب معين ، ومعاه نقاش على شحال من صوت يقدر يجيب كل واحد، وكيفاش يمكن يتحسب العدد المرتبط بهاد التحركات.

وحسب مضمون التسجيلات، ما بقاش لهضرا محصورة فالأفراد، ولكن دواو على 3 مؤسسات، من بينها مؤسسة“خديجة” لمعاريف ، وكيفاش غادي تم عملية التصويت والإعداد.

وبحسب نفس المصدر ، وفي تسجيل آخر كانت كدور فيه لهضرا بين مرشح فأحد اللوائح الانتخابية فدائرة و لوسيط على مبلغ ديال 10000 درهم لي صيفتها ” لخال” لأحد لأخ أحد لمسؤولين على المؤسسات تعليمية لي كان فيها تصويت نهار 23 شتنبر ، ولي طلب من لمترشح في دائرة أنه مايصيفتش لفلوس لخوه حيت جبد ليه صداع معاه بحيت كان ملزم خاصو اشرح ليه مصدر لمبلغ المالي وعلاقته بيه .

ووفق نفس تسجيل ، لمسؤول على لمؤسسة طلب اشوف لمترشح ولكن الطرف لي مع الحزب لمجهول لحد الساعة حسب تسجيل صوتي رفض ، وجاوبو بلي ممنوع عليه يتلقاه شخصيا وأنو لغرض لمهم هو يصيفتليه حقو .

وقبل ما توصل القصة للمحكمة، كانت المنافسة فآنفا فيها عدد من الأسماء واللوائح، فدائرة كتعتبر من أكثر الدوائر حساسية فكازا، واللي خصصات ليها أربعة مقاعد برلمانية.

وكانت نتائج فانتخابات 23 شتنبر 2026، مفاجأة بحيت تصدر حزب العدالة والتنمية النتائج فآنفا عبر عبد الصمد حيكر، متبوعا بالأصالة والمعاصرة عبر نجوى كوكوس، ثم تحالف اليسار عبر نبيلة منيب، والتجمع الوطني للأحرار عبر محمد شباك، حسب النتائج المنشورة بعد الاقتراع.

ولكن بالنسبة لحسن البركاني، اللي سبق ليه فاز بمقعد برلماني عن آنفا فانتخابات 2021، القصة ما سالاتش مع إعلان النتائج.

الطعن اللي تقدم به لحسن البركاني مرشح حزب الاستقلال كيرجع للنقاش ديال المرحلة اللي سبقات الاقتراع، خصوصا من خلال التسجيلات اللي كيقول الملف إنها مرتبطة بتحركات وأحاديث وقعت قبل الانتخابات مع مترشح فدائرة منافس ودابا تسجيلات راه دفعوهم لمحاميين ديالو باش دار ليهم الخبرة التقنية.

و إلا تأكدت صحة التسجيلات ونسبت الأصوات لأصحابها، فهنا غادي يكون على القضاء يحدد القيمة القانونية ديالها ومدى تأثيرها على الطعن فنتائج انتخابات 2026