كود سبور//

شكر ابراهيم البحراوي لاعب أولمبيك آسفي صحابو فالفريق على المستوى اللي قدموه ضد الرجاء الرياضي، واخا خسرو وتقصاو من سدس نهائي كاس العرش، وأكد الدعم ديالو لصاحبو عبد الرحمان كسال اللي ضيع بيلانتي، اعتبر أن الفريق تأثر بسبب غياب جمهورو على الماتش.

وبعد خسارة أولمبيك آسفي مع الرجاء بنتيجة 2 لزيرو، قال إبراهيم البحراوي: “كنشكر الدراري على المجهودات اللي دارو، درنا ماتش كبير وجاونا فرص وهادو هما مباريات الكاس وملي كضيع ضروري كتخلص وأي واحد يقدر يزگل بيلانتي وحنا كنساندو الزميل ديالنا عبد الرحمان كسال هو لاعب كبير، ومازال غيقول الكلمة ديالو، وغير 2 سيمانات هادي كان ربحنا”.

وكمل البحراوي: “نتمناو الماتشات الجايين نرجعو الفرحة للفريق وما نكدبوش على ريوسنا اليوم افتقدنا للجماهير ديالنا والصراحة كتحس بنقص كبير، حيث جماهيرنا كتعطينا حافز باش ديما نربحو الماتشات واليوم ما كانوش وكنطلبو منهم المسامحة ويشجعونا فالمباريات المقبلة”.