كود الرباط//

فريق اتحاد المقاولات بمجلس المستشارين، حتى هو عرف صراع على شكون يشد بلاصت عبد الإله حفظي، محاسب المجلس، للي دار فضايح فهاد المؤسسة وتعين بلاصت مراة وورط الديوان الملكي فتعيينات المجلس الأعلى للتربية والتكوين، ولكن حسب مصادر “كود” هاد المنصب تحسم لصالح رجل أعمال شاب هو رضى الحميني.

الحميني، حسب مصادر “كود”، وهو شاب ورجل أعمال ناجح وكثر من هاد الشي هو محسوب فالفريق على اتحاد مقاولات المغرب لكنه حزبيا منتمي للتجمع الوطني للأحرار، يعني أن الأحرار غا يربحو فالمكتب منصب إضافي.

الباطرونا بمجرد ما تفكو من عبد الإله حفظي رجع الصراع على بلاصتو بين نايلة التازي ومحمد رضى الحميني.

يشار أنه، مباشرة بعد جلسة انتخاب الرئيس لي كانت نهار السبت، ناضت قربالة داخل المجلس وتقريبا فكل الفرق. والسبب؟ احتدام الصراع بين أعضاء الفرق بالغرفة الثانية حول المناصب بأجهزة وهياكل المجلس: المكتب، والفرق واللجان الدائمة، وخاصة فرق الأغلبية الحكومية.

وكان مقرر تنعاقد جلسة ثانية نهار الاثنين 14 أكتوبر لاستكمال انتخاب هاد الهياكل، لكن أغلب الفرق ما قدروش يقدمو اللوائح ديال المرشحين ديالهم باش يتم التصويت عليها دفعة واحدة، كيما هو منصوص عليه فالنظام الداخلي.