گود سبور//

تفتح تحقيق في قضية المشجع اللي نزل فماتش البارصا ضد خيتافي فبطولة الصبليون الويكاند اللي فات فتيران يوهان كرويف، وهاز العلم الفلسطيني، بعدما تشكات رابطة الليگا وصيفطت شكاية للاتحاد الإسباني البارح الثلاثاء وقررت لجنة الانضباط تحل أونگيط.

وحسب جريدة “موندو ديبورتيفو” القريبة من البارصا، فالنادي معرض لعقوبة وغرامة مالية صغيرة على البارصا بسبب المشجع اللي نزل للتيران هاز العلم الفلسطيني.

وقالت “موندو ديبورتيفو” إنه وحسب محضر الحكم ديال الماتش، وحيث ما كانش شي تأثير من الحادث على الماتش، فالعقوبة من لجنة الانضباط غاتكون خفيفة على البارصا وكاتوصل حتى 602 أورو گاع، حسب المادة 132 من القانون الانضباطي للاتحاد الإسباني لكرة القدم.

ولكن إلى تعتابرات المخالفة جسيمة، فالخطية على البارصا غادي توصل لـ 3006 أورو حسب المادة 90 اللي كاتحمل الاندية مسؤولية تنظيم الماتشات ويقدرو يلعبوها ويكلو 3 الماتشات حسب خطورة الحادث.