كود سبور//

ربحو البارصا كأس ملك الصبليون، بعدما فاز فريقهم على ريال مدريد السبت بإشبيلية فالفينال.

وسالا الوقت الأصلي من الماتش بين ريال مدريد والبارصا بنتيجة 2 للجوج، وكانوا البارصا هما اللي ماركاو الاولين بواسطة بيدري بهدف فالشوط الأول وبالضبط فالدقيقة 28، بعد أسيست ديال لامين يامال، قبل ما يرجعو ريال مدريد فالشوط الثاني وماركاو 2 أهداف عن طريق كل من مبابي فالدقيقة 70 وشواميني فالدقيقة 77، قبل ما يعتق توريس البارصا بهدف التعادل فالدقيقة 84، ومشاو الفراقي لعبو الأشواط الإضافية، وفيها قدرو البارصا يزيدو الهدف الثالث عن طريق كوندي فالدقيقة 116.

وبهذه النتيجة توج البارصا باللقب ديالو 32 فكأس ملك الصبليون، وريال مدريد ولاو مهددين بأنهم يخرجو بزيرو لقب هذا الموسم، وبقات لهم غير بطولة الصبليون هما التانيين فيها ورا البارصا المتصدرين وبيناتهم 4 نقاط.