كود سبور//
خدامين البارصا فلاكاديمي ديالهم فالرباط التابعة لاكاديمي الأم “لاماسيا” فإسبانيا، (خدامين) فتنقيب على المواهب المغربية فالكورة فعمر صغير، باش يصقلوها ويطوروها من خلال تكوين جد متطور فكرة القدم وبأسلوب ديال البارصا.
لاكاديمي ديال البارصا فالرباط، خدامين فيها أطر من خرجي مراكز تكوين نادي برشلونة الإسباني، بينهم أجانب ومغاربة، ومقابل التكوين فيها مدير تقني إسباني من أطر البارصا، وكيسهر على الكبيرة والصغيرة فلاكاديمي ديال الرباط.
وكشف مارك باديا مدير لاكاديمي د البارصا فالرباط لموقع “كود”، أن أكاديمية البارصا فالرباط، هي عبارة على مركز تكوين للفئات السنية الصغيرة وأن هذا المركز كيتوفر على كفاءات ومؤطرين بمؤهلات كبيرة، الدور ديالهم هو تلقين اللاعبين الصغار أبجديات التكوين ديال الكورة.
ماركا باديا، وضح أن السونطر ديال البارصا فالرباط، كيعتمد فتكوين اللاعبين الصغار على طرف حديثة وعصرية فالتكوين ديال الكورة، وأن اللاعبين اللي دخلو فلاكاديمي بداو كيتطور فالمستويات ديالهم.
مدير أكاديمية البارصا فالرباط، اكد ان هذا السونطر ماشي فقط لتكوين اللاعبين صغار السن أبجديات الكورة، ولكن هو ايضا مدرسة غيتلعمو فيها بزاف ديال الحاجات فتنفعهم فحياتهم إذا ما لاعبوش الكورة، وركز ايضا على ان التعليم البيداغوجي ممهم بزاف بجانب التكوين ديال الكورة.
وتحدث عبد المجيد لوراوي وهو مدرب حراس المرمى فلاكاديمي د البارصا فالرباط، وقال لموقع “كود” ان هاد التجربة زوينة والطريقة والتقنيات ديال التكوين اللي فيها جديدة ومختلفة على طرق التكوين فالفرق اللي كنعرفو، وكتبدا من لاج ديال 6 سنين حتى 18 عام.
وكمل مدرب الكوال وقال: “الاطفال واللاعبين الصغار غيتعامو فلاكاديمي بزاف ديال الحاجات وغيستافدو من خبرة المدربين والمكونين، اللي كاينين هنا فالسونطر، وهذا الإمكانيات اللي كاينة هنا راه ما كيناش عند الاندية وقليلة الفرق اللي عندها”.
وزاد وضح لوراوي: “كيتواجدو معنا هنا مدربين من “لاماسيا” لاكاديمي الام د البارصا، والأسلوب والمنهج المعتمد فالتكوين هو عصري وفريد من النوع ديالو، حيث هو خاص غير البارصا فقط، وها الاطفال غيستافدو بزاف باش يكونو من احسن اللاعبين فالمغرب”.
وقررت أكاديمية “لاماسيا” ديال البارصا الاسباني تدير فرع لها بمدينة الرباط، وغيكون هدفها التنقيب على المواهب المغربية فكرة القدم وتكوينها.
وكتعرف لاكاديمي ديال البارصا فالرباط، إقبال كبير عليها، وعدد من الآباء والأمهات كيحيبو الأبناء ديالهم لها باش يتعلمو أبجديات الكورة، ويستافدو من برنامج كامل مكون من دورات تدريبية ومباريات، والهدف هو تطوير وتحسين مهارات اللاعبين المغاربة الناشئين، وتقديم تكون مزيان لهم على أسلوب البارصا المعترف به، وعلاش لا ما يكونوش حتى هما لاعبين فالبارصا او فرق عالمية ومغربية مستقبلا.
موضوعات أخرى
اللبؤة ابتسام الجرايدي محيحية فبطولة السعودية وربحت هدافة الموسم
كافو: حكيمي واعر بزاف ومن احسن 2 فالعالم
گول ودادي معروف غايخدم مع بنهاشم فتدريب گوال الوداد
