عبد اللطيف اكنوش ///

الحساب ديال شريان لَبْحاير ديال الدلّاع…غا مْعايْنة… ذيك 25٪؜ ديال المغاربة يتحدثون الأمازيغية لا تعني ان 75٪؜ راهم عرب…وللي كايگول هاذي راه خاصو يمشي لسبيطار الحمّاق…تتكلم لغة أو ما تتكلمهاش ماعندها علاقة بالعربي أو بالأمازيغي اطلاقاً ولُحْمار عارفها…

وكيفاش حسبات المندوبية السامية للتخطيط هاذ العدد أثناء الإحصاء الأخير؟ أنا بعدا وجيراني والدرب كولو، والجماعة كولها، والعمالة كولها، والجهة كولها، حتى واحد ماعمرو سولنا واش كاندويو بالأمازيغية ولا أووهو …وكيفاش حسبها السي لحليمي ولا السي بنموسى؟ واش غا مْعايْنة وغا مَشْرى لَبْحايرْ وغا على الله؟

وذيك 21٪؜ ديال المغاربة عاطلين على العمل، بغيت نعرف كيفاش حسبها السي بنموسى؟ واش سوّل المغاربة دار بدار؟ واش كاين عندنا مؤسسات محلية كاتقوم بتشغيل المغاربة وكاتحسبهم وكاتعرف نسبة البطالة نهار بنهار وشهر بشهر وعام بعام؟ من حقي ومن حق المغاربة يعرفو كيفاش كاتحصيوا الشومورات…إذا كان غاتسوال راه نتوما عارفين كيفاش المغاربة كايجاوبو على بحال هاذ الاسئلة…خاصة إذا كنتو كاتعطيوهم الدعم…وطبيعي المغربي يتْنكْرا ويخاف يگول ليك خدام وتقطع عليه الدعم… وبركة ما تبداوش تخراو علينا اكثر من اللازم…راه ما كاناكلوش لخّرا غَبْرة…