كود كازا //

الفاتيكان خرج البرنامج الرسمي ديال الزيارة “الدينية” ديال البابا لاوون الرابع عشر، اللي غادي يدير جولة إفريقية بين 13 و23 أبريل 2026، وتشمل الجزائر، الكاميرون، أنغولا وغينيا الاستوائية، فواحد التور اللي ماشي غير ديني ولكن حتى سياسي ودبلوماسي بامتياز.

أول محطة غادي تكون فالجزائر، نهار 13 أبريل، البابا غادي يزور مقام الشهيد، ويتلقا بالرئيس الجزائري، ويدير لقاء مع السلطات والمجتمع المدني.

البابا غادي يزور حتى الجامع الكبير فالجزائر، ويسالي النهار بلقاء مع الجالية المسيحية فكنيسة السيدة الإفريقية.

نهار 14 أبريل، البابا غادي يتحرك لعنابة، فين غادي يزور موقع هيبون الأثري ودار المسنين، ويدير قداس كبير فبازيليك القديس أوغسطين، قبل ما يرجع للجزائر.

من بعد الجزائر، البابا غادي يشد الطريق لياوندي فالكاميرون. البرنامج فيه تركيز كبير على القضايا الاجتماعية، خصوصا زيارة دار الأيتام ولقاء مع الأساقفة.

فباميندا، المدينة اللي عرفت توترات، البابا غادي يدير لقاء من أجل السلام، وهي رسالة مباشرة للوضع الأمني فالبلاد.

دوالا بدورها غادي تعرف قداس كبير فملعب Japoma، وزيارة لمستشفى، ثم لقاء مع الطلبة الجامعيين، في إشارة لدور الشباب فالمستقبل.

فـ18 أبريل، البابا غادي يحط فأنغولا، ويدير لقاء مع الرئيس والسلطات، قبل ما ينخرط فأنشطة دينية كبيرة، أبرزها قداس فكيلامبا.

الزيارة غادي تشمل حتى مزار “ماما موكسيما”، واحد من أهم المزارات الدينية، وزيارة لمدينة سوريمو، مع لقاء موسع مع رجال الدين.

آخر محطة غادي تكون فغينيا الاستوائية، فين البابا غادي يلتقي بالرئيس، ويشارك فأنشطة ثقافية.

فـمونغومو، غادي يدير قداس، ومن بعد يزور مدرسة تكنولوجية، قبل ما يمشي لباتا، فين غادي يزور السجن ويوقف دقيقة صلاة على ضحايا انفجار 2021.

الختام غادي يكون بلقاء مع الشباب والعائلات، وقداس كبير فمالابو، قبل العودة لروما.