كود كازا ///

كلشي ف”دوزيم” كيخلع. تصورو كيمشيو غير اللي فيه الضو ويضربوه. اخر هاد الشي ما كشفته النقابية فالنقابة الوطنية للصحافة المغربية حنان رحاب. كتبات باللي ادارة “دوزيم” وقفات الصحافي وديع دادا عن مهامه كرئيس تحرير للاخبار وحالتو على المجلس التأديبي بحجج قالت باللي “واهية” وهو انو كيقدم ندوات وكيشارك فانشطة خارج القناة.

حسب مصدر ل”كود” فدادا جاه ايميل من حميد ساعدني اللي اصلا ما يستاحقش يبقى فالقناة والادارة دارت ليه التمديد. هاد الايميل فيه باللي موقوف على العمل انطلاقا من الاثنين

تصورو كاين شي وحدين ف”دوزيم” كيديرو الاشهار كاع وما عمر حد قرب منها. والاشهار ماشي غير التقديم. بلا ما نهدرو على فضايح مديرية الاخبار. شفتو واحد مشى لباريس ودوز وحدة كدير الاشهار لريسطو ديالها. هاداك خاصو الفصل ماشي التوقيف ووالو

ايلي وديع دادا كيدير ندوات راه حقاش فيدو ماشي بحال شي برا كاصي ف”دوزيم”. ماشي بحال بنت النقابي اللي خلى الدفاع عن مصالح المستخدمين وتواطأ مع الادارة باش يدخلو بنتو الضعيفة جدا باش تكون صحافية فالقسم الفرنسي. واه واه على الفرنساوية.

هاد الانتقام جا بعد ما جددات البارح الجمعة 18 اكتوبر 2024 النقابة الوطنية للصحافة تنسيقيتها. كان حاضر فهاد اللقاء وديع دادا واللي انتخب فالمكتب.

هاد اللقاء اللي حضروه عدد من الصحافيين٬ وهدرو على ضرورة مضاعفة الجهود والترافع الجدي في سبيل خلق بيئة عمل سليمة كفيلة بالارتقاء بأدائه المهني وأوضاعه المادية على حد سواء. ‎

واش هاد الشي تضييق على هاد التنسيقية؟ محتمل جدا خصوصا ان لخراين همهم يضربو على ريوسهم وعائلاتهم