كود سبور//

ولى الاهلي المصري مقبرة ديال اللاعبين المغاربة، بعدما ولى فالاعوام اللي دازو اكبر خطر على الاندية المغربية، حيث كايطير منها اللاعبين الميزيانين، وهما نفسهم اللاعبين اللي كايتعرضو للتهميش فالفريق المصري ملي كايمشيو يلعبو فيه او كايتعرضو للاصابة، والنتيجة كاتكون هي تراجع مستواهم وهذا الشي لوقع ليوسف بلعمري اللاعب السابق للرجاء الرياضي، اللي تحول من نجم الفريق الأخضر ولاعب منافس على مركز الظهير الأيسر فالمنتخب المغربي إلى لاعب مهمش فالأهلي ومن بعدها توعت.

واعلن طبيب الاهلي احمد جاب الله اليوم الثلاثاء، إصابة يوسف بلعمري، وان الفحوصات الطبية اللي تدارت اللاعب المغربي فالفريق المصري، بينت ان عندو ديشيرور فليزاديكتور ديالو.

طبيب الاهلي وضح ان اللاعب دابا غادي يخضع للعلاج الطبيعي وبرنامج تأهيلي فالمرحلة المقبلة باش يوجده يرجع يشارك مع الفريق.

هاد سيناريو الإصابات والتهميش فالأهلي المصري، عاشوه فالفريق قبل من يوسف بلعمري مجموعة من اللاعبين المغاربة اللي كانو واعرين ففراقيهم ونجوم، بحال بدر بانون، وأشرف داري، ويحيى عطية الله، واشرف بنشرقي اللي مازال مضارب على بلاصتو وسط الفريق المصري.