كود – عثمان الشرقي//

فخطوة فنية شدات انتباه متبعي الأغنية الأمازيغية، انتقلات الشيخة فاتي من مجموعة الفنان لحسن الخنيفري من بعد سنوات ديال العمل والتعاون مع الفنان لحسن أسرار، اللي بصمات فيها على حضور مميز فعدد من السهرات والمناسبات الفنية فمختلف مناطق المغرب وخارجو.

والتحقات الشيخة فاتي رسمياً، وبشكل حر، بمجموعة الفنانة يامنة العمراوي النسائية، فانتقال وصفوه عدد من المتابعين بأنه من أبرز “الانتقالات الصيفية” فالساحة الفنية الأمازيغية، بالنظر للمكانة اللي كيتتمتعو بها الطرفين عند الجمهور.

وكتعتبر يامنة العمراوي من الأصوات النسائية المعروفة فهاد اللون الغنائي، حيث راكمات تجربة مهمة من خلال مشاركاتها فالحفلات والأعراس والمهرجانات، وخلقات ليها قاعدة جماهيرية واسعة خصوصاً فمناطق الأطلس.

وفاتصال مع “كود”، أكدات الفنانة يامنة العمراوي تعاون فاطمة الزهراء، المعروفة فنياً بـ”الشيخة فاتي”، بالمجموعة ديالها، كما وضحات أن هاد التجربة جات بشكل عادي وطبيعي، حيث الراقصات والفنانات كيبقاو أحرار فالعمل مع أي فنان أو مجموعة، مادام ما كاين لا عقد ولا التزام دائم كيربطهم بطرف معين.

وكيشوف عدد من المهتمين بالشأن الفني أن هاد الخطوة تقدر تعطي نفس جديد للمسار الفني ديال الشيخة فاتي، وتفتح ليها أبواب تجارب وأعمال جديدة رفقة الفنانة يامنة العمراوي، اللي كتعتبر بدورها من الأسماء البارزة فالأغنية الأمازيغية.

فاطمة الزهراء الخنيفرية، المعروفة عند الجمهور باسم “الشيخة فاتي”، ولات من الوجوه البارزة فالسهرات الشعبية بفضل الشطيح المتألق ديالها، إضافة للثقافة والرزانة اللي كيميزو شخصيتها الطبيبة فاتي سبق ليها أنها صرحات فحوار سابق مع “كود” بأنها كتفرح ملي كتساهم فإدخال البهجة والفرحة على الناس، وما عندها حتى مشكل ملي كيلقبوها بعض المتابعين بـ”طبيبة لي داوي الاكتئاب”.

https://www.facebook.com/share/v/1ETRYFMmQK/

ومع انطلاق الموسم الصيفي اللي كيعرف حركية كبيرة فالسهرات والحفلات، كيبقى الجمهور متشوق يشوف الشيخة فاتي مع مجموعتها الجديدة، ويكتشف شنو غادي تقدم فهاد المرحلة الجديدة من مسيرتها الفنية.