كود الرباط //

فاز حزب التجمع الوطني للأحرار بالمرتبة الأولى فانتخابات جزئية جديدة خاصة بعضوية مجالس الجماعات الترابية، اللي دازت البارح الثلاثاء، بعدما حصد 61 مقعد فـ58 دائرة انتخابية عبر التراب الوطني.

هاد النتائج كتأكد أن “الحمامة” مزال كيتصدر المشهد الانتخابي المحلي، وكيعزز مكانتو فعدد من الجماعات اللي سبق وربح فيها فانتخابات 8 شتنبر 2021. هاد التفوق، حسب مصدر حزبي ل”گود”، راجع للعمل الميداني لي كيشتغل عليه الحزب، وكذا الوجوه المرشحة لي عندها ارتباط مباشر مع الساكنة وبرامج عندها علاقة بشبكات جمعيات ومصالح.

لكن، المنافسة ما كانتش سهلة، خصوصا مع حزب البام اللي دار بدورو نتائج مهمة وربح مقاعد فمدن ودواوير معروفة تاريخيا أنها من معاقلو الانتخابية.

كما ان حزب الاستقلال كيرجع بقوة فبعض المناطق، وهادشي كيعني أن المنافسة باقية مفتوحة، خصوصا مع اقتراب بداية العد العكسي للانتخابات المقبلة.

الانتخابات الجزئية كيشوفوها احزاب الاغلبية بلي دليل على استمرار ثقة المواطنين فيها، لكن فالمقابل المعارضة ممسوقاش لهاد النتائج خصوصا حزب العدالة والتنمية لي عندو مؤتمر نهاية هذا الاسبوع، ومن ديما كيقول بلي الانتخابات الجزئية ماشي مهم لقياس شعبية الاحزاب.