كود الرباط//

يسود غموض كبير وسط المنتخبين والأحزاب السياسية بالرباط، حول المرشح المحظوظ الذي سيزكيه حزب التجمع الوطني للاحرار لخوض غمار الانتخابات البرلمانية الجزئية بدائرة المحيط، المزمع تنظيمها يوم الخميس 12 شتنبر 2024.

وحسب أحد المرشحين لخوض الانتخابات الجزئية، هضر مع “كود”، فراه الاحرار هو الحزب الوحيد لي محسمش فالتزكية ديال المرشح لي باغي ينافس به، علما أنه غايكون عندو دعم تحالف الاغلبية (البام والاستقلال).

ويروج بلي سعد بنمبار، صاحب فضيحة تفويت سكن وظيفي لسيدة ماشي موظفة (بارطما ب1000 درهم فالشهر فشارع الحسن الثاني بالرباط)، خدا التزكية.

لكن مصادر من الأحرار قالت لـ”كود” بلي مكاينش حسم دبا، وبلي مزال متعطاتش التزكية، والمرشح لي غايكون طبعا خاص توفر فيه شروط النزاهة وبعيد على الشبهات وغايتماشا مع مدونة الاخلاقيات بمجلس النواب.

وعكس الاحرار، حسمت احزاب كثيرة المرشحين ديالها، خصوصا الاتحاد الاشتراكي والعدالة والتنمية وفيدرالية اليسار، الاخيرة هي لي قدمات فاروق مهداوي وجه شبابي وهو كذلك صحفي سابق بجريدة فبراير.كم ورصيف 24،

الغريب حسب مصادر حزبية هو اصرار بنبمارك على الترشح وباغي التزكية باش مكان، رغم انه صاحب فضيحة تفويت سكن وظيفي لمرا ماشي موظفة، غير هادي خصها تحقيق قضائي لأنه فيه شبه تبديد المال العام، وزيد عليها تقرير المجلس الاعلى للحسابات حول تدبير شركة رباط باركينغ في عهده.

ومن المنافسين ديال بنمبارك، كاين أمين صادق، نائب عمدة الرباط، وأحد الفاعلين الاقتصاديين بالعاصمة، لي دخل على خط الترشح للانتخابات الجزئية.

أمين صادق، هو حاليا المرشح الأكثر حظا في الحصول على التزكية من قيادة حزب التجمع الوطني للأحرار، حيث يعتبر أحد أبرز نواب عمدة الرباط فتيحة المودني، مكلف بالملف الاقتصادي، وله مكانة وازنة وسط المستشارين والنواب من مختلف الأحزاب (معارضة وأغلبية)، ويعرف أنه شخص يشتغل في صمت وهدوء بعيدا عن الأنظار. لكن كيواجه واحد من الاعيان لي كيتحكمو فالتزكيات.