محمد سقراط-كود///
الصراحة ماشي من العدالة أن الأمريكيين بوحدهم لي يختارو لي يحكم العالم، وباقي سكان الأرض فقط يكتافيو بالمشاهدة علما أن حياتهم كتأثر بطريقة مباشرة أو غير مباشرة بشكون غادي يطلع رئيس لميريكان، كاين أفراد لي حياتهم متعلقة بالانتخابات الأمريكية لي غادي تحدد واش غادي يموت أو يعيش بحال أطراف النزاع في الحرب الأوكرانية الروسية، أو الصراع في الشرق الأوسط وباقي العالم، حنا نيت في المغرب راه ترامب بالنسبة ليا أنا بعدا وكنظن حتى بالنسبة لعقلاء البلاد راه بطل شعبي وطني لأنه بتويت منه عتارف لينا بطرف من بلادنا كانوا باغين يهرفوا علينا فيه خوتنا لي بحالنا، هذا صراع ديال عشرات السنين قدر ترامب بتويت يحسم فيه، أما كون طلعات كامالا غادي تبدى تشوف داكشي ديال حقوقييون يزورون الصحراء ويتضامنون مع الكادة بنت مويليد، وأراك لذريعة حقوق الإنسان والحيوان والمواقف اللاواضحة، خويا ترامب فاراها معانا بتويت ونوض نايض.
الانتخابات الأمريكية خاص تولي عالمية يشارك فيها العالم كامل بحكم أن العالم كيتأثر بها وبحكم أنها كتحدد لي غادي يحكم العالم تقريبا فراه خاص نشاركوا فيها، راه بزاف ديال المغاربة سهروا الليل كامل كيتسناو شكون غادي يربح ومتبعين حتى البرامج السياسية لكل منتخب، وكاين منهم لي كون نجحات كامالا ودفع للقرعة كان يقدر يكون عندو الزهر أنه يمشي يعيش في أرض الرجال الأحرار، والعكس إلى طلع ترامب غادي يسد ويبقى بسبابو حاصل معانا في أرض الرجال لي إلى عبروا بحرية في الأنترنيت بلا ميدعيو للعنف كيمشيو للحبس.
انتخابات كتوقع في العالم الجديد في دولة تصاوبات غير هادي تقريبا كثر من ميتين سنة ومع ذلك قدرات أنها تولي إمبراطورية تحدد مصائر الشعوب والدول والاقتصادات في العالم، وتحدد حتى مصير دول عريقة ضاربة في التاريخ، هادي عظمة العالم الجديد لي خاص شي طريقة واقعية باش نوليو نشاركوا في الانتخابات ديالهم، حيت الانتخابات ديالنا بحال إلى معندها حتى شي أثر على الحياة دالمغاربة، راه واخا تبان فكرة غير واقعية ولكن راه فيها الكثير من الحقيقة وخاص تتحول لمطلب عالمي، راه مايمكنش لمهاجر نقز الحيط بين ميريكان والميكسيك أنه فاش يصاوب وراقوا يحدد مصير الحرب في الشرق الأوسط واليمن أو أوكرانيا، راه خاص نشاركوا حتى حنا باقي سكان العالم لي معنيين بهاد الانتخابات.
