كود عن لوديسك//

فمدينة المحمدية، كيبان أن الأمير مولاي رشيد خدام بهدوء باش يرجّع الحياة لمشروع فندقي كبير فبلاصت “ميرامار” القديمة ،و حسب المعطيات ديال لوديسك دازت عملية عقارية مهمة بزاف، فيها أراضي كتوصل القيمة ديالها ل 470 مليون درهم.

المشروع كيتعلق ببناء مركب سياحي فالبلاصة ديال أوطيل “ميرامار” اللي كان مشهور بزاف ،هاد لوطيل تفتح فـ1927، وكان فواحد الوقت كازينو فيام الحماية، ومن بعد ولى مقر للجنرال باتون فـ1942، ومن بعد حتى ولى مكان كيجيو ليه مشاهير كبار ،ولكن من التسعينات بدا كيتهمل حتى تهدم فبداية سنوات 2020، وخا الاحتجاجات ديال الناس اللي كانو باغين يحافظو عليه.

دابا، فهاد الأرض اللي فيها تاريخ كبير، كاينة عملية كبيرة باش يتجمعو بزاف ديال الأراضي فمشروع واحد، واللي كيسهرو على هاد الشي هما ناس مقربين من الأمير، من بينهم مهدي لجواهري وهشام الشرايبي، ومعاهم شركات مختصة فالتدبير والمحاسبة.

الشركة اللي غادي تدير المشروع، وهي “الشركة الفندقية للمحمدية”، لي فيها جوج شركات آخرين، وحدة فيهم عندها أراضي قيمتها 476 مليون درهم، موزعة على 7 قطع أرضية بمساحة كتوصل لـ5.83 هكتار ،وبعد هاد العملية، غادي يطلع راس مال الشركة بزاف.

فالمجموع، المشروع فيه 9 هكتارات ديال الأراضي ،ومن خلال الوثائق القديمة، كيبان أن “ميرامار” كان فيها كلشي، اوطيلات، فيلات، جرادي، تنس، مطعم، كازينو… ولكن دابا كلشي تهدم وما بقا غير فالأوراق، والمشروع الجديد هو اللي غادي يحاول يرجّع داك التاريخ .

هاد المشروع كيبيّن دخول الأمير مولاي رشيد لمجال الفنادق الفخمة، فحين أن الملك محمد السادس حتى هو كيوسّع المشاريع ديالو فلوطيلات من علامة “رويال منصور”.

وزيد على هاد الشي، فالساحل ديال المحمدية كاينين حتى مشاريع عقارية أخرى مرتبطة بالأميرات للا أسماء وللا مريم، فبلايص اللي كانت أراضي كبيرة ديال عائلة مانسمان.

تفاصيل اكثر ف”لوديسك”

رابط المقال