الرئيسية > كود-تيفي > بالفيديو. الاغتصاب.. عمتو.. الفلوس.. لحيس الكابة.. كود جمعات ليكم 6 نقط باش ديزي دروس فرگع البيگ
07/01/2019 16:30 كود-تيفي

بالفيديو. الاغتصاب.. عمتو.. الفلوس.. لحيس الكابة.. كود جمعات ليكم 6 نقط باش ديزي دروس فرگع البيگ

بالفيديو. الاغتصاب.. عمتو.. الفلوس.. لحيس الكابة.. كود جمعات ليكم 6 نقط باش ديزي دروس فرگع البيگ

كود كازا//

الكلاش لي خرج ديزي دروس وجاوب فيه البيكَ مول 170 كيلو كان جامع مانع، جبد ليه فيه القديم والجديد، ومازال مخبي شي ضواسة مگيحين كيفما كَال في “المتنبي”.

ولد بن لمدون مجاش واختار أبو طيب المتنبي غير هاكاك، مشا ل”لاكريم” ديال الشعراء فتاريخ الشعر العربي باش يبين ليه أن النيفو طالع، وماشي غير هضرة خاوية، وف 7 ديال الدقايق عطاه العُصارة والتخت ديال الخيخ لي ممكن يجي في كلاش بمعنى الكلمة والحرف والنقطة.

النقطة رقم واحد: ميلودة حازب

مع الدخلة مع التصرفيقة اللولة. عمتو ميلودة حازب القيادية في حزب التراكتور، ولي كانت مع الحزب الوطني الديمقراطي ديال الكولونيل عبد الله القادري، لي أسسو قبل 38 عام دابا مع محمد أرسلان الجديدي بعدما فرتكها مع حزب الحمامة، ولي هو في الأصل كاع ديال ادريس البصري.

فهاد العامين ميلودة مات ليها الحوت، ويمكن الفترة الوحيدة لي كان فيها عليها الأضواء بشكل كبير بزاف، ملي عطاها عبد الاله بن كيران في 2015، وجاوبها داك الجواب الشهير ديال “ديالي كبر من ديالك”، عقلتو عليه؟ سينو قلبو عليه في اليوتوب.

وميستر كازا فونيا جاه فاص حيت زعما عمتو هي لي كتضبر ليه في الدعم.

جوج: شوكران

البيكَ بقا ديما كيقول أنه هو الأول في الراب، وفي الكلاش الأول حشى المعاني حيت كانو روابة مجموعين (ديزي دروس، بابي مشكيل، نيسو، ماسطا فلو، شايفين، وشد بيدهم حتى بانو وكل واحد وقف على صح.

وكيف أي مغربي كنبقاو عاقلين على الخير (زعما) وبغا ديما يخليهم تحت الصباط (الصورة ديال الكلاش واضحة)، وبقا باغي الاعتراف مدى الحياة، و”شوكران” ديال ديزي كانت بالقاصح والطحين والبلانات المقودين، وقال ليه “بغيتي نكًول ليك شوكران، هانا نكُول ليك شوكران سمع.. اااااخ تفو”.

ثلاثة: مومو والعلالي والرمضاني

ديزي نيش على مومو بوصفيحة لي ف “هيت راديو”، علاش؟ حيت كاين واحد الفيديو دار البوز مؤخرا وكان جامع البيكَ وديزي وطبقة ديال الروابة، وكان تما الدون هو الشاف ديالهم، وواحد اللقطة “عزي” گال: “البيكَ ووليداتو تا فرقة مغلباتو”. في “المتنبي” قال ليه “هادشي ماشي ديال اليوتوب ماشي ديال گوگل أدسينس، هادشي ماشي ديال الراديو، مومو خليك بعيد حسن”، حيت مومو كيشد فيديوهات ديال الحلقات ديال البرنامج ديالو وكيحطهم في لاشين يوتوب ديالو باش يدخل فلوس صحيحة.  عايقين بالقوالب.

من بعد داز لرشيد العلالي، مول الكاميرا خفية في دوزيم لي طحنو ولي بصح داير الضحك فراسو بالتلصاق لي فيه. بقا دائما في الاعلاميين والمنشطين، ودار لرضوان الرمضاني لي عزيز عليه، وخدا ديال الدون في “قفص الاتهام” باش يبان الفيلم كامل بحال المحاكمة والكلمة كتبقى السبع لي هو ديزي.

ربعة: الاغتصاب والعيالات

ديزي دروس مكيدويش من فراغ، والكلاشات جبد فيهم بلانات منهم نهار شدوه مع شي قاصر في أكادير وكَال “هادشي بحال المعدة جرات ليك، بحال البواسر، هادشي بحال نهار شدوك مع القاصر في أكادير وعيط على بنسليم وكبو داكشي لي كًول سمو عليه..”

البيكَ كان جبد ليه مرتو لي ماشي مغربية، وقال ليه في 170 كيلو ” حالة فمها مترعا، حمار درب داها مسرحا”، وهو يجاوبو ديزي “كتدوي على مرتي ونت مراتك لي تزوجات ب*حبة، الا كانت ساطة كتخلص الكرا را بعرقها، أما نت كتخلصو فالقبة صلاة العصر 11 ركعة”.

خمسة: الوسام وأبو زعيتر

النقط القاصحة هما ملي دوا على كيفاش قلب الفيستة، ومابقاش كيدير المورسوات من بعد ما خدا الوسام في 2013 من درجة قائد، وقال ليه “علقتي وسام، مابقيتي كترابي حتى طراك.. وات دفاك؟ تا واحد مابقا مسالي لخراك”. من داكشي ديال 20 فبراير توفيق حازب دار الفلوس ورجع تكمش اللور، ولا جامع عليه شي وليدات كيسجل ليهم وهو عايش بفلوس 2011 وأغنية “مابغيتش”.

وملي رجع دابا للراب، حشا ليه الهضرة بـ”ياكما قطعو عليك زيزا شوف ليك مع أبو زعيتر باش تطلع تضرب شي لحيسة” زعما را أبو زعتير صاحب الملك ويقدر يتوسط ليك باش تضرب اللعاقة عوتاني.

ستة: دعم وزارة الثقافة اللي خدا فيه 240 مليون فعامين

من بعد الوسام، وواخة البيكَ نعس على جنب الراحة، ومابقى كيدير حتى أغنية، وحتى حاجة فنية او “تا *لوة” بصوت ديزي دروس كان كياخد الدعم، وف عامين ضرب 240 مليون بكل روح رياضية، ولي دوا يرعف.

في 2015 و2016 توفيق خدا أكبر حصة من دعم المشاريع الموسيقية من وزارة الثقافة، وأكبر قيمة ديال الدعم كانت من نصيبو. الروينة وكلشي بقا داوي على الموضوع، من موراها مابقينا سمعنا والو على هاد البلان.

في 2016 خدا 64 مليون سنتيم، فيها 20 مليون ففئة الانتاج الموسيقي والغنائي، 20 مليون ثانية في فئة ترويج المنتوج الموسيقي، و24 مليون عن جوج مشاريع توزيع وتسويق. وا لهلا يزيد كثر.

الخلاصة من هاد 6 نقط:  ديزي فرع البيكَ.. وسالينا.

موضوعات أخرى

20/05/2019 16:15

داهي اگاي “لگود” : الدعوة ضد ابراهيم غالي حطيتها اليوم عند الوكيل العام ومجلس القضاء فإسبانيا و”لي كيكول عني ماني صحراوي ايجي ايواجهني ورمضان مسعود ليس من ضحايا الجبهة (نص الشكاية)