مصطفى الشاذلي گود سبور//

للمرة الثالثة كايتلقاو لاعبين المنتخب الوطني المغربي  مع لاعبين قدام، قبل شي ماتش مهم، وهذه المرة قبل ماتش المغرب ضد النيجر غدا الجمعة برسم إقصائيات كاس العالم 2026.

اليوم الخميس تنظم حفل بمركب محمد السادس لكرة القدم بالمعمورة، تم فيه تكريم اللاعبين الدوليين السابقين اللي من عصبة الرباط-سلا، وحضروه اللاعبين الحاليين د المنتخب المغربي على راسها اشرف حكيمي والطاقم الثقني بقيادة وليد الركراكي.

ثقافة الاعتراف مزيانة تكون عندنا فمجال كرة القدم المغربية، ولكن واش كان ضروري يتقام هذا الحفل اليوم الخميس قبل بساعات من ماتش المغرب ضد النيجر اللي ملعوب غدا الجمعة؟ وفين هو التركيز ديال اللاعبين والطاقم التقني ديال المنتخب المغربي على ماتش ديال غدا ضد النيجر؟

كيفاش لاعبين دوليين وناخب وطني عندهم ماتش مهم مؤهل لكاس العالم 2026، وتم السماح بإقامة حفل لتكريم لاعبين سابقين داخل الكونسونطراسيون ديال ليكيب ناسيونال بمركز محمد السادس، اللي عندهم فنفس اليوم فالعشية حصة تدريبية اخيرة قبل الماتش، واللي ملعوب غدا الجمعة، فكيفاش هاد اللاعبين غايبقاو مركزين على الماتش وهما داخل عليهم البراني، واش دابا كون كان مازال وحيد حاليلوزيتش ناخب وطني كان غايسمح بهذا الشي؟ طبعا لا، وعلاش وليد الرگراگي سمح بهذا الشي ولثلاث مرة على التوالي بعد تكريم الدوليين السابقين بالجهة الشرقية ملي لعب المنتخب فوجدة، ومن وراها فيونيو الماضي ملي لعب بفاس، وراه الرگراگي هو المسؤول الاول على هذا الشي حيث هو اللي خاصو يضمن ويضبط اجواء التركيز داخل المنتخب.

راه ما عندناش مشكل مع اللاعبين السابقين ومحتارمين داكشي اللي عطاو للكورة المغربية، ومزيانة تكون عندنا ثقافة الاعتراف، ولكن ماشي على حساب المنتخب الوطني المغربي اللي عندو ماتش مهم للتأهل للمونديال.

الجامعة كيتكرم كل مرة لعابة دوليين فمنطقتهم. شفناها فالشرق وفالشمال واليوم فالرباط وربما غدا ايلى لعب المنتخب فكازا، يكرمو نجوم المنتخب فكازا، غير التوقيت خاصو يكون بعد الماتش ماشي قبل.