كود – طنجة//

دعا المكتب الجهوي ديال الحزب الاشتراكي الموحد بجهة طنجة-تطوان-الحسيمة وزارة الأوقاف والشؤون الإسلامية باش تفتح الجوامع، خصوصاً اللي ما كتستعملش ديما بحال بلاصة العيالات قدّام المنكوبين والمجليين، ويتستغلو كملاجئ مؤقتة تحفظ كرامة العائلات اللي خلات ديورها ولا تضررات بسبب الفيضانات.

وطالب الحزب، فبلاغ توصلات به “ݣود”، بالإعلان الرسمي على مدينة القصر الكبير كمنطقة منكوبة، وشدد الحزب على ضرورة يكون تواصل رسمي، واضح ومسؤول، من طرف جميع المسؤولين، وعلى رأسهم مسؤولو وزارة التجهيز والسلطات الجهوية والإقليمية، بخصوص تطورات الوضع، باش ما يبقاش المجال للإشاعات ولا لجهات كتستغل الكوارث الطبيعية باش دير الخوف وتزرع الفتنة بين المواطنات والمواطنين.

ووضح الحزب أنه كيف ما عاونات الدولة الوحدات الفندقية والسياحية فيام كوفيد-19 بالدعم العمومي، فمن باب التضامن والمسؤولية الاجتماعية خاص تبادر هاد الوحدات، خصوصاً فمدن الجهة لي مضررة، وتخصص عدد من الشومبرات فابور أو بثمن رمزي لفائدة الأسر المتضررة، خصوصا اللي عندها البطاقة الوطنية جاية من القصر الكبير.

كيف ما أكد الحزب الاشتراكي الموحد بلي المعالجة الظرفية ما بقاتش كافية، وجدّد الدعوة باش دار سياسات وقائية حقيقية، وتخطيط عمراني مسؤول، وربط المسؤولية بالمحاسبة، حمايةً لأرواح المواطنين والمواطنات وكرامتهم.