كود سبور//

معولين لاعبين المنتخب الوطني المغربي لاقل من 17 عام، بقيادة المدرب نبيل باها، يدخلو كاس افريقيا هنا فالمغرب اللي غاتبدا غدا الاحد، بالرباح فأول ماتش على أوگندا والهدف ديالهم هو التتويج باللقب ويفرحو المغاربة.

وهضر حمزة بوهدي لاعب المنتخب الوطني المغربي فتصريح له للموقع الرسمي للجامعة الملكية المغربية لكرة القدم، وقال: “غدا الاحد عانلعبو ضد أوگندا الماتش الاول ديالنا وحنا مستعدين 100% وكلشي واجد وشحال وحنا كانتسناو هاد البطولة وداخلين لها باش نديوها، وحنا لاعبين فبلادنا وسط الجمهور ديالنا، وهو سندنا”.

أما احمد موهوب لاعب المنتخب المغربي فقال: “كيفما عارف كلشي ما بقى لينا والو على لاكوب دافريك، وبدينا نوجدو له من شحال هادي كمجموعة، وحنا اللاعبين والطاقم التقني تايقين فريوسنا وعارفين شنو المسؤولية اللي علينا وبغينا نفرحو الشعب المغربي، والماتش الاول ضد اوگندا ما غايكونش ساهل، ولكن حنا خاصنا نربحو باش ويتحل لينا الطريق فالبطولة”.