كود -وكالات//

واحد المؤثرة مريكانية نبهات البنات لواحد الأثر الجانبي اللي ممكن يوقع من بعد إزالة الشعر بـ«البرازيليان واكس»، لي هو أن الريح كتولي مسموعة أكثر.

سارة باوس، اللي كيتابعوها مليون واحد، قالت: «إلا كنتي غادي تديري Brazilian wax وغيحيدو ليك الشعر من المنطقة الخلفية باش تولي ناعمة ورطبة، راه مزيان ،ولكن كاينة واحد الحاجة اللي حتى واحد ما كيقولها ليك»

وشرحات المؤثرة أن شعر المؤخرة كيخلق شوية ديال الاحتكاك ملي كيدوز الغاز، ولكن ملي كيتحيد الشعر، كتولي البشرة عريانة وكيقدر الصوت يخرج بشكل مسموع.

وقالت باوس: «خلينا نهضرو على الفيزياء. ملي كتخرجي الريح، شعر المؤخرة كيخلق واحد الاحتكاك وكيعطي شي حاجة باش يدوز منها الغاز. ولكن ملي كتنتفي الشعر كامل، ما كيبقى والو. الريح بلا صوت ما بقاتش موجودة».

وبحسب كورتني كلاهورن، مؤسسة صالون متخصص فالعناية بالجسم فعدد من الولايات الأميركية، إزالة الشعر فعلاً كتخلي الجلد ناعم وعريان، وبالتالي فمن الناحية النظرية، الاحتكاك المباشر بين الجلدين، خصوصاً مع الرطوبة، يقدر يساهم أحياناً فظهور أصوات غير متوقعة.

وضافت أن اللي كيعاني من هاد المشكل يقدر يحاول يخلي المنطقة باردة وناشفة، ويلبس ملابس داخلية وكسوة واسعة ومهوية، باش ينقص الاحتكاك والرطوبة.

كما نصحات بالانتظار على الأقل 24 ساعة من بعد «البرازيليان واكس» قبل العلاقة الحميمة، و48 ساعة إلا كانت البشرة كتتعرض بسهولة للشعر اللي كينبت تحت الجلد.