الرباط گود سبور//

غادي يستقبل الملك محمد السادس اليوم الأربعاء، جيلZ ديال المنتخب الوطني المغربي، اللي دارو إنجاز تاريخي حيث هداو للمغرب أول كاس عالم فـ كرة القدم، بعدما ربحو كوب ديموند لأقل من 20 عام الأحد الماضي بالشيلي، ومن المتوقع يكونو فهاد الاستقبال اللاعبين والعائلات ديالهم بما فيهم الآباء.

وبعدها كان سيدنا استقبل المنتخب الوطني المغربي الأول فـ عام 2022، ملي تألقو الأسود ودارو إنجاز الوصول لدومي فينال مونديال قطر، وخلال الاستقبال حضرو أمهات اللاعبين مع ولادهم وتم تكريمهم من طرف الملك محمد السادس، بعد الدور اللي لعبوه الأمهات فـ تحفيز ولادهم اللاعبين من خلال حضور ماتشات المونديال كاملين، فهاد المرة من المتوقع يحضرو حتى عائلات اللاعبين ديال المنتخب المغربي لأقل من 20 عام، وهو المنتخب المكون من ما يعرف بـ “جيلZ” (الجيل اللي تزاد وحل عينيه فـ عصر الإنترنيت والفيسبوك…) والمتوقع يكونو حتى آباء اللاعبين حاضرين فهاد الاستقبال الملكي، حيث الاباء حتى هما كانوا حاضرين فـ الشيلي مع ولادهم وشجعوهم، بحال مثلا بات احسن لاعب فـ كاس العالم للشباب عثمان معمّا اللي كان ديما كايحضر ماتشات المونديال باش يشجع ولدو وراه منعوه الأمن د التيران باش يهبط للملعب لتحت عند ولدو يحتفل معه ملي سالا الفينال وكانت لحضة صعيبة شويا.

ومن المتوقع يحضر هذا الاستقبال الملكي اللي خصصو سيدنا لجيلZ ديال المنتنخب الوطني المغربي، ولي العهد الأمير مولاي الحسن، كيفما كان حضر للاستقبال الملكي للمنتخب الاول بعد إنجاز مونديال 2022، مع العلم أنه وبعدما يستقبل سيدنا الأشبال بالقصر العامر بالرباط، غايكون وراها استقبال شعبي وجماهيري مباشرة بعد خروجهم من القصر الملكي بالرباط، حوالي الساعة السادسة والنصف مساء، وغايدوزو اللاعبين من  باب السفراء، وشارع محمد الخامس، وهذا المسار  هو لي خلال الاستقبالات الملكية كايدوزو منو غير الشخصيات الكبار، بحال مثلا الرئيس الفرنسي إيمانويل ماكرون ملي كان للمغرب.