كود سبور//

كتواصل الاستعدادات فستاد دونور لاحتضان ماتش إياب ربع نهائي السوبر ليك الإفريقي بين الوداد الرياضي وإنييمبا النيجيري، واخا الأخير مازال ما وصلش للمغرب، ويتأكد إجراء الماتش بشكل رسمي فالموعد ديالو الجديد.

موقع “كود” دار دورة فمركب محمد الخامس بالدار البيضاء اليوم الثلاثاء، وتصادف مع تواجد طاقم التحكيم ديال الماتش بقيادة الحكم الكابوني بيير أتشو، اللي جاو يشوفو حالة الكازو فستاد دونور ودارو جولة مع ريوسهم فالتيران.

التحضيرات فستاد دونور مازال مستمرة، وكاينين صحاب الميناج اللي كيسيقو كاع المدرجات ديال ليزون فالمركب وكاينين التقنيين اللي كيديرو الروتوشات ديالهم الأخيرة، والأجواء كاملة كتبين أن ستاد دونور باغي يكون فأحسن حلة نهار الماتش.

للإشارة، فالماتش بين الوداد الرياضي وإنييمبا النيجيري تأجل من غدا الأربعآء إلى بعدو الخميس، حيث الفريق النيجيري مازال ما وصلش للمغرب، وقال فبلاغ له أن التأخر ديالو راجع لعدم حصول الطيارة ديالو على ترخيص الهبوط فمطار محمد الخامس.