كود سبور//

نقصت العصبة الوطنية لكرة القدم الاحترافية من العقوبة اللي مسلطة على الرجاء الرياضي بسبب الاحداث اللي كانت وقعت فماتش الفريق ضد المغرب التطواني فسانية الرمل فتطوان ضمن الدورة 21.

وأكدت مصادر “گود”، أن لجنة الاستئناف فالجامعة الملكية المغربية لكرة القدم قررت تخفيض العقوبة الصادرة على الرجاء الرياضي من 4 الماتشات بلا جمهور نافذة، إلى 4 الماتشات بلا جمهور 2 نافذة و2 منها موقوفة التنفيذ.

ووضحت نفس المصادر، أن الرجاء الرياضي من حقو دابا وابتداء من الماتش الجاي ديال الفريق اللي غيكون فسدس عشر نهائي كاس العرش وغيلعب فيه ضد أولمبيك اسفي يستقبل المباراة بحضور الجمهور.

وكان فريق الرجاء الرياضي وبعدما صدرت فحقو العقوبة بعد ماتش المغرب التطواني، استقبل 2 ماتشات بلا جمهور، وبالتالي الفريق أستنفذ العقوبة المسلطة عليه.

وبالتالي فالرجاء الرياضي يقدرو يستقبلو الماتشات ديالهم الجايين بحضور الجمهور ديالهم، حيث ديجا الفريق استقبل 2 ماتشات بلا جمهور ملي صدرت العقوبة.