عفراء علوي محمدي- كود//

مازالين الإصابات اليومية بكورونا طالعين، بحيث غير اليوم الجمعة 6 غشت، تقاسو 11358 واحد ف24 ساعة فقط، وهو ثاني أعلى رقم يومي كنسجلوه منهار بان الوباء.

واليوم سجلنا كذلك رقم كيخلع فالوفيات بكوفيد، بحيث 76 توفاو بسباب كوفيد.

و309 دخلو للإنعاش غير هذ النهار.

ولكن فالمقابل تشافاو اليوم 8916 واحد، وهو رقم طالع على المعتاد.

وهذو التفاصيل:

التلقيح:

وصلنا فمجموع الملقحين بالجرعة الأولى ل14981732، بينما وصل فعدد اللي تلقحو كليا ل10870130.

الإصابات:

وتقاسو اليوم 11358 واحد من أصل 48436 واحد دار التحليلة، ووصل عدد المصابين فالمجموع ل676683.

ومؤشر الإصابة التراكمي وصل ل1856 لكل 100 ألف نسمة، بمعدل إصابة ديال 31 لكل 100 ألف نسمة فهذ 24 ساعة.

حالات الشفاء:

تشافاو اليوم 8916، ووصل الإجمالي ل598958، بنسبة تعافي ديال 88,5 فالمية.

الوفيات:

اليوم ماتو 76، ووصل هكذا عدد الوفيات ل10163، بنسبة فتك 1,5 فالمية.

الحالات النشيطة والحرجة:

وعدد الحالات النشيطة طلع ل67562، وعدد الحالات الحرجة وصل ل1541،من بعد تدهور حالة 309 غير اليوم، و47 كاينين تحت التنفس الصناعي الاختراقي.

ووصلات نسبة ملء أسرة الإنعاش ل43 فالمية.