سامي العلوي ـ ابن احمد كود//

عرفات واحد المنطقة فمزاب، وبالتحديد فبلاصة سميتها “الحجرات” ولي تابعة للجماعة الترابية سيدي الذهبي اليوم الاحد احتفال بذكرى “الهيلولة” اليهودية، ولي هي مناسبة كبيرة عند يهود المغرب، ولي تفكرو فيها واحد الحاخام ولا ولي صالح ديالهم اللي مدفون تما، حضرو فيها مسؤولين إقليمين وأمنيين.

هذا الحفلة دارت فبلاصة “الحجرات” لي معروفة عند اليهود المغاربة من شحال هادي. كانو كيسكنو فيها عائلات يهودية كثيرة مع المسلمين، وكان بينهم تعايش كبير. كيخدمو فالتجارة والفلاحة والحرف، وكان عندهم معبد ديالهم “السلات” وجبانة “الميعارة” اللي باقية تال دابا، حتى ملي هاجرو بزاف منهم فالخمسينات والستينات، بقاو كيرجعو كل عام للهيلولة باش يزورو الولي ديالهم ويعاودو يتلاقاو مع الأرض اللي كبرو فيها.

مصدر حضر لهاذ الحفلة قال بلي النهار داز فالهدوء والاحترام، وجاو الناس من المغرب ومن برا، وحتى ولاد المنطقة اللي عاقلين على جيرانهم اليهود ولي قالو إن الهيلولة ماشي غير احتفال ديني، راه تذكير بالتعايش اللي كان ديما بين المسلمين واليهود فالمغرب، وهادشي جزء من الهوية ديالنا.

الحضور الرسمي كان واعر، شفنا السلطات المحلية، والكاتب العام ديال العمالة، وناس من المجلس المحلي والإقليمي. هادشي كيبين باللي الدولة كتعطي قيمة لهاد التراث.

الهيلولة ديال الحجرات ماشي غير ذكرى، راه شهادة حية على التاريخ المشترك، وعلى التعايش اللي كيميز المغرب.