كود – العيون ////

احتفال الشعب المغربي بالذكرى الخمسين لعيد المسيرة الخضراء اللي محطة تاريخيّة غادي تبقى خالدة فتاريخ المغاربة وحتى العالم، وبفضلها رجعات الأقاليم الجنوبية للوطن الأم وكتب الملك الراحل الحسن الثاني صفحة جديدة فسجل المغرب وسيادته الوطنية ووحدته الترابية.

هاد العام ماشي بحال گاع السنوات، هاد العام تزامن هاد الإحتفال مع نصر دبلوماسي كبير حققو سيدنا لترسيخ مغرية الصحرا وكمّل مشوار والده الحسن الثاني، بحيث تمكن من انتزاع حق مشروع للمغرب والدعم لمبادرة الحكم الذاتي تحت السيادة الوطنية بموجب قرار مجلس الأمن رقم 2797.

ولأن هادا إنجاز وفگاع البلدان والعالم كاينين كائنات كيخرجو يحدثوننا عن بطولاتهم بعد ما يخلد الشهداء كيف قال تشي گيفارا، دازت هاد الإحتفالات فالعيون والداخلة بشكل فيه بزاف ديال البهرجة والتخريبيق اللي ما عندو تا معنى وخلى هاد الإحتفالية فرمزيتها الوطنية وقيمتها تاخد مسار خارج السياق بعدما تحولات لمحج لشي وحدين لا صفة لهم ولا قيمة وحولوها لمحطة لتسويق أنفسهم على الرغم من أنهم بعاد على قضية الوحدة الترابية للمملكة، وبعاد على الصحرا، وماشي من ساكنتها، وما عندهم ما يضيفو ليها ولا للشعب المغربي.

أول هاد هواة القفز بالزانة واللي حاولوا يستعملو الذكرى الخمسين لعيد المسيرة باش يروجو لراسهم هو هداك وزير الشباب والثقافة والتواصل، المهدي بن سعيد، اللي جايب للعيون عرض ديال الطائرات المُسيرة لي درون وجاي يحضر ليه. دابا شنو فائدة هاد العرض؟ تا حد ما عارف ولا عندو فكرة وشنو اللي جاب لينا جديد. زعمة عطانا تاريخ لبلاد وحكاه لينا هاد العرض. الدروس قريناهم أ السي بنسعيد فالإجتماعيات وقريناهم بالموروث الثقافي اللي كنا كنيمار من اللي كبر منا ومنك.

غادي يجيو شي وحدين يقولك هاد العروض راه تحكي ما تحكي جزء من المسيرة الخضراء وتاريخ المغرب، وراه طريقة مبتكرة وزيد وزيد. الحقيقة هي أن مالين الدرون راه هوما هادوك اللي حدا الجدار الرملي سهرانين ليل ونهار باش يدافعو على المغرب وملكهم، الدرون الحقيقي هو  هاداك اللي واقف يحمي بلادو من إستفزازات البوليساريو، وبفضل هاداك الدرون أنت دابا يا بنسعيد فالعيون فمناخ فيه الأمن والإستقرار، والتاريخ اللي كتخبى موراه، فعلا كيتكتب بالدرون الحقيقي، ولكن ماشي الدرونات اللي كتقدم العروض بالضواو وبالفلوس من لفوق فالعيون، ولكن كيتكتب بدماء رجال عطاو لهاد البلاد وما بغاوش مقابل ولا طالبو بيه وفيهم اللي منسي گاع.

نوعية بنسعيد كاينة عندنا بزاف. كيفاش دبا نادي سيارات ونادي دراجات جاي للعيون يدور فيها ويدير عروض وسباقات. آشنو هي الفائدة من هاد الأنشطة؟ وباش غادي تفيد المنطقة؟هاد النوع من الأنشطة؟ راه قلة إحترام فحق ناس الصحرا، وتقليل من شأنهم، واللي كيقول بأنه بغا يدير صلة الرحم مع هاد الربوع يحك جيبو ويخلص تذكرة الطائرة ويخلص لطويل ويجي مرحبا بيه. اللي وصلات ليه الذكرى الخمسين لعيد المسيرة الخضراء فالصحرا راه عبث وعبث كبير ما خاصة نسكتو عليه. حنا ماشي ضد الإحتفال، حنا ضد هاد المظاهر ديال الإستغلال البئيس لذكرى وطنية ومحطة تاريخيّة باش يستاهلها شي حد باش يحقق منفعة شخصية ليه أو يزوّق صورتو قدام لمغاربة.

فهاد الذكرى أيضا بانو شي فنانين وطنيين ووطنيين زايدين ع القياس جاو دارو سهرات وخلقو جو مزيان، ولكن راه الوطنية كتكون بزيرو درهم ماشي بالمقابل، بمعنى إلى جيتي للعيون أو الداخلة باش تحتافل بمغربية الصحرا فراه خاصك تميزي شوية وتخلص تذكرة الطيارة ولوطيل من جيبك وما تاخدش مقابل السهرة اللي غادي دير، وديك الساع ممكن نقولو راك درتي مزية.