بني ملال كود//

دائرة قصبة تادلة – دوار أيت علي هاد الصباح عرفات موقف احتجاجي بوعبيدي ، مني طلع واحد الراجل فوق بوطو ديال الريزو، كيطالب بالعلاج ديال ولدو لي مريض وما لقاوش شنو يدير ليه حيت عايش فظروف اجتماعية صعيبة.

دخل رئيس الدائرة الأولى لقصبة تادلة مع قائد قيادة أيت ربع باش يكالميو الموقف ويقنعوه ينزل، وبداو الحوار على مطالبه بطريقة سلمية وقانونية، باش يحميوا حقوقو وحق ولدو فالرعاية الصحية فالاخير اقتنع باش ينزل ويحاورهم

هاد الواقعة جات من بعد أيام قليلة مورا ما طلع شاب على قنطرة فمدينة قصبة تادلة، كيطالب بحقو فالشغل، قبل ما الجمعية المغربية لحقوق الإنسان تقنعو بصعوبة بعد اكتر من 5 ساعات باش ينزل ويهضر مع المسؤولين ويدير معهم اجتماع وحتى فسوق السبت الشهر لي فات، وقع نفس المشهد، منين طلع شاب على الشاطو حيت الوليدة ديالو مريضة بكونصير وما لقا لي يداويها.

هاد الأحداث كتأكد المعاناة اليومية للناس فالجهة ، وكتبرز الحاجة الملحة باش يكونو حلول حقيقية لمشاكل الصحة والشغل والخدمات الاجتماعية، ومن المحتمل أن هاد النوع الاحتجاجي الفردي لي بداه بوعبيد أولاد يوسف يزيد ينتشر