كود سبور//

يقدر يكون تغيير فالوقت ديال إقامة كأس إفريقيا 2025، اللي غينظمها المغرب وما تلعبش البطولة فالأول ديال العام كيفما تعود الاتحاد الأفريقي ينظمها، حسب ما كشفت عليه تقارير إعلامية.

وكشفت شبكة “Actu Foot Afrique” أن كأس إفريقيا للأمم اللي ربح المغرب تنظيمها اليوم الأربعاء، بإجماع أعضاء المكتب التنفيذي د الاتحاد الأفريقي لكرة القدم، غتلعب فالصيف ماشي الشتا.

وتعود الاتحاد الإفريقي لكرة القدم ينظم كاس أفريقيا فشهر يناير، بسبب الحالة الجوية فالدول الإفريقية وخصوصا بلدان إفريقيا جنوب الصحراء، حيث كتكون فيها الحرارة طالعة، ولكن إقامة كوب دافريك فشهر يناير وسط الموسم الرياضي كيدير مشاكل ما بين المنتخبات الأفريقية والفرق الأوروبية بسبب اللاعبين، وهذا راه ولا كيأثر على بزاف من النجوم الأفارقة اللي ما بقاوش كيسنيو مع فرق كبار بسبب إقامة كاس أفريقيا فشهر يناير.

وكان الاتحاد الإفريقي لكرة القدم نظم كأس إفريقيا 2019 فمصر فالصيف، قبل ما يرجع ينظم المسابقة فالشتا عام 2021 فالكاميرون، مع العلم أن الجو فالمغرب كيكون أكثر اعتدالا فالصيف من كاع دول القارة الإفريقية.

للإشارة فالمغرب احتضن فشهر يونيو وشهر يوليوز اللي فاتو كأس إفريقيا لأقل من 23 عام، ودازت البطولة مزيان من جميع النواحي سوا التنظيم والجمهور أو الطقس، فصيف 2022 نظم المغرب كأس أفريقيا للسيدات وحتى هي دازت مزيان.