گود سبور//

قرر الاتحاد الأوروبي لكرة القدم فتح تحقيق فواقعة تعرض البرازيلي فينيسيوس جونيور للعنصرية البارح فماتش ريال مدريد الإسباني ضد بنفيكا البرتغالي البارح الثلاثاء ضمن دوري أبطال أوروبا، من طرف لاعب بنفيكا بريستياني اللي هو أرجنتيني وجماهير الفريق البرتغالي.

وأعلن الاتحاد الأوروبي لكرة القدم اليوم الأربعاء أنه، غادي يفتح تحقيق فشبهة وقوع حادث ديال التمييز، بعدما اتهم فينسيوس جانلوكا بريستياني بالعنصرية ضدو.

بنفيكا نفاو هاذ الشي وقالو إن بريستياني ما قالش شي حاجة عنصرية لفينيسيوس، والبرتغالي جوزي مورينيو مدرب الفريق البرتغالي حتى هو قال بلي الطريقة باش احتفل فينسيوس بالهدف كانت مستفزة وأنه كان خاصو يحتفل بشكل محترم وأن غير بريستياني انتقد نجم ريال مدريد حيث بروفوكا لاعبين بنفيكا وجمهورهم، مع العلم أن مورينيو خدا حمرا مع نهاية الماتش بسبب الاحتجاج والمطالبة ببطاقة الصفرا الثانية لفينيسيوس.

أما الفرنسي كيليان مبابي فقال إن صاحبو فريال مدريد فينيسيوس تعرض بالفعل للعنصرية من طرف لاعب بنفيكا بريستياني، وانه ملي دار التوني على فمو قال له “القرد” وسمعو كايقولها له شحال من مرة وحتى لاعبين آخرين فبنفيكا قالوها، وهذا الشي راه نفاه بريستياني.

البروتوكول ديال الاتحاد الأوروبي لكرة القدم ضد العنصرية، كايقول حسب المادة 45 إن الحكم خاصو ملي يتوصل بشي حاجة ديال العنصرية فالماتش يدير قبضة اليدين ويوقف الماتش مع توثيق شنو وقع، وحتى اللاعب الضحية او الكابيتان ديالو او الطاقم التقني من حقهم يديرو نفس الإشارة باش يعلمو الحكم بالعنصرية، والحكم من حقو يوقف الماتش بصفة نهائية إلى كانت العنصرية من وراهادي الشي، وكايتعتبر الفريق المستقبل خاسر وكايتحمل مسؤولية هذا الشي، أما اللاعبين اللي كايحصلو دايرين العنصرية كايتعاقبو بالتوقيف لـ10 ماتشات.