الرئيسية > آراء > الإقالة قربت لرمزي ولاعبين الوداد كتسناهم الشطابة: خاصو يجمعهم ويحل المشاكل معهم قبل ما يفوت الفوت
03/12/2023 09:00 آراء

الإقالة قربت لرمزي ولاعبين الوداد كتسناهم الشطابة: خاصو يجمعهم ويحل المشاكل معهم قبل ما يفوت الفوت

الإقالة قربت لرمزي ولاعبين الوداد كتسناهم الشطابة: خاصو يجمعهم ويحل المشاكل معهم قبل ما يفوت الفوت

كود سبور//

صبح مستقبل عادل رمزي مدرب الوداد الرياضي مهدد بالإقالة من الفريق، بسبب الوضع اللي كيعيشو الواك، اللي خسر الماتش الرابع له على التوالي، وحتى عدد كبير من اللاعبين فالفريق من المنتظر تدار لهم الشطابة.

المستوى الهزيل والكارثي ديال الوداد فالماتشات الأربعة الماضية، وتجرع الفريق الخسارة الرابعة على التوالي بالهزيمة اليوم السبت مع أسيك ميموزا الايفواري ضمن الجولة الثانية من دور مجموعات دوري أبطال افريقيا، هذا الشي كيقرب عادل رمزي لحبل الإقالة، حيث هو المسؤول الاول على النتائج والأداء ديال الحمرا، مع العلم ان هذا المدرب هو نفسو اللي وصل مع الفريق قبل اسابيع قليلة لفينال السوبر ليك الأفريقي، وهذا الشي كيعني انه ماشي مدرب خايب ولكن عندو شي خلل خاصو يلقى له حل وبسرعة.

اما بالنسبة للاعبين للوداد اللي دارو مستويات كبيرة فالسوبر ليك ووصلو حتى للفينال وهذا الشي غير قبل اسابيع قليلة، فكيبان ان الأغلب ديالهم ما بقاش قادر يعطي فوق التيران، واخا يالاه وصلو للثلث الاول من الموسم، حيث كيبانو تالفين ذهنيا وتكتيكيا ومامركزينش وحتى بدنيا ما واجدينش وثقال، وهذا الشي كيزيد يعطي للمنتقدين ديالهم فرص للمطالبة بالرحيل ديال عدد منهم فالميركاتو الجاي، والتوقيع مع عناصر جديدة.

مسؤولية كبيرة اليوم قدام عادل رمزي وعلى اللاعبين ايضاً، حيث الوداد محتاجين اليوم يتجمعو كعائلة فيها مشاكل بحال كاع العائلات ويجلسو جلسة مصالحة وصراحة ونقد للذات، وخاص عادل رمزي يجلس مع اللاعبين اللي عندو معهم مشاكل وبعدهم من ليكيب بحال زهير المترجي وأسامة محروس وغيرهم ويحل معهم المشكل، حيث الواك فريق ديال كاع الوداديين، وراه المصلحة العامة د الفريق كبر من اي حاجة، وحتى هاد اللاعبين وغيرهم خاصهم يراجعو نفوسهم ويعرفو بلي هازين توني ثقيل اي لاعب كيحلم يلبسو واذا عندهم مشكل مع المدرب خاصهم يحلوه معه، وهذا الشي قبل ما يفوت الفوت، حيث كلشي غيمشي وغيبقى الوداد وجمهورو.

موضوعات أخرى

21/02/2024 19:00

بالنسبة للعيالات المغربيات الكاسك والتغوتينيت من اهم اختراعات لي خدمات تكافئ الفرص للمرأة مع الرجل من بعد أقراص منع الحمل طبعا

21/02/2024 18:31

سيدنا هضر بالصبليونية مع سانشيز.. وقالو: شحال هادي ماهضرت فالتليفون مع الملك فيليبي – فيديو

21/02/2024 18:20

البنك الدولي: النمو الاقتصادي فالمغرب تحسن وتوقع يرتفع لـ3,5 فالمية والتضخم غاد يتراجع وها شنو خاص يدير بنك المغرب

21/02/2024 17:46

البرلماني السابق الفايق تبلغ فحبس “راس الما” بقرار تجريدو من عضويته فمجلس النواب

21/02/2024 17:26

ها شنو طرا بين اخنوش وسانشيز: كثر من ساعتين من المباحثات والتوجاد للمونديال ومارشيات كبار كيتسناو الشركات الاسبانية والتعاون الأمني والموقف من حرب غزة