وكالات//

البوليس البريطاني بدا تحقيق كبير بعدما تطلقو جوج سجناء بالغلط من حبس واندسوورث فجنوب غرب لندن، فواقعة جديدة كتزيد فـسلسلة الأخطاء اللي دايرة ضجة وانتقادات كبيرة ضد مصلحة السجون فالبلاد.

حسب بوليس لندن، مواطن جزائري عندو 24 عام تْطلق بالغلط فآخر أكتوبر اللي فات، ولكن إدارة السجن تسنات 6 أيام قبل ما تبلغ السلطات الأمنية بالخطأ اللي وقع.

وفحادثة أخرى، البوليس قالو إنها كتقلب على سجين ثاني تْطلق حتى هو عن طريق الخطأ من نفس السجن، ووجهو نداء للناس باش يعاونوهم يلقاوه، حسب ما قالت “بي بي سي”.

هاد الحوادث جاو من بعد أسابيع قليلة على عملية بحث دامت 3 أيام على مهاجر إثيوبي غير قانوني سميتو هادوش كيبادو، اللي تْطلق بالغلط حتى هو، رغم أنه محكوم عليه بالتحرش بفتاة قاصر وامرأة راشدة، وكان ساكن فواحد الفندق ديال طالبي اللجوء فمقاطعة إسيكس.

البوليس شدوه من بعد فـ26 أكتوبر فـمنطقة فينسبري بارك شمال لندن، ومن بعد رحلاتو لإثيوبيا، والسلطات اضطرّات تعتذر رسمياً ووعدات بإصلاحات مستعجلة.

لونكيط بيّن أن الحباس اللي تْطلق مؤخراً هو إبراهيم قدور شريف، واللي مسجل فـقائمة المجرمين الجنسيين.

وشريف كان تْدان فـنوفمبر 2024 بتهمة “سلوك فاضح”، وتْحكم عليه بـ18 شهر ديال الخدمة المجتمعية، مع المراقبة فالسجل الجنسي لمدة 5 سنين.

هاد الأخطاء المتكررة خلات بزاف ديال الناس يشكّو فالكفاءة ديال نظام السجون البريطاني، خصوصاً مع الضغط الكبير على وزارة العدل باش تشرح شنو واقع وتقدّم ضمانات باش ما يتعاودوش بحال هاد الحوادث اللي ممكن يهددو سلامة الناس.