كود سبور//

الإعلام الجزائري مرة أخرى وفبلاصت ما يوجه أسهم الانتقاد للسلطات ديال بلادو اللي خلطات السياسة بالرياضة وفشلات أنها تحافظ على لقب كأس أمم إفريقيا للمحليين بالجزائر، ناض كيحاول يصدر الأزمة للخارج وطبعا الوجهة المفضلة له هي المغرب حيث عندو عقدة من كل ما هو مغربي.

خسارة فينال كأس إفريقيا للمحليين قلقات بزاف الإعلام الجزائري ولكن ماشي من أولياء النعمة ديال شنقريحة وتبون، بل على العكس راه هاد الثنائي مساكن فنظر وسائل الإعلام الجزائرية ما خلاو ما دارو باش الكاس يبقى فالجزائر ومن بين الطرق اللي سلكوها أنهم حرمو المنتخب الوطني المغربي حامل اللقب فالنسختين الماضيتين من المشاركة فالبطولة ورفضو يرخصو لطائرة لارام المغربية أنها تدخل ليكيب ناسيونال للجزائر باش تعبد الفريق للمنتخب الجزائري ولكن فالأخير فشل فهز الكاس.

كلشي كان كينتظر أن الإعلام الجزائري يناقش أسباب هزيمة منتخب بلادو فالشان، ويسلط الضوء على شنو واقع بالضبط عندهم حيث سخرو أشياء مشروعة وغير مشروعة رياضيا باش يربحو الكاس ومع الأسف فشلو، ولكن من جديد الإعلام الجزائري وجه البوصلة ديالو نحو المغرب والإعلام المغربي فموقف جزائري كيثير السخرية.

وهاد المرة الزميل رضوان الرمضاني كان هو هدف الإعلام الجزائري من بعدما ضيع منتخب الجزائر الهدف ضد السنغال فالفينال وطار الكاس إلى دكار من بعدما فازت به الرباط 2 مرات، وطبعا أي واحد هنأ الشعب السنغالي الشقيق فهاد اللحظات المهمة بالنسبة للسنغال البلد اللي كيرتبط تاريخيا بالمغرب ودينيا وجغرافيا وغيرها، فكيتعتبر عدو للجزائر فنظر الطبالة ديال شنقريحة وتبون، ونساو أن السنغال هي امتداد تاريخي للمغرب فإفريقيا كيفما أن الجزائر راه امتداد ديال العثمانيين وفرنسا أو ربما كيجهلو هادشي ولا ما قارينش التاريخ.

وكيف عادتها الشروق الجزائرية اللي مازال كتعيش غروب وضبابية فمواقفها سعرات وهاجمت الصحافي المغربي رضوان الرمضاني، حيث كتب على فيسبوك ديالو وهو كيبارك للشعب السنغالي فرحة التتويج بكأس إفريقيا للمحليين دون ما يتكلم على الجزائر بأي حرف احتراما للشعب الجزائري الشقيق اللي كيبقى عزيز ولو أن السلطات فبلادو وإعلامها خرج العيب بزاف، وبدات كتدخل الشروق وكتخرج فالكلام دون دليل أو برهان.