عمر المزين – كود////

صدرات اليوم الإثنين 19 يناير 2026 دورية عن الإدارة العامة للجمارك والضرائب غير المباشرة، كتهم الاستثمارات والأنظمة الخاصة، وكتدخل فإطار التعليمات العامة لعمليات الصرف لسنة 2026، وجابت إجراءات جديدة بخصوص الاعتمادات بالعملة الصعبة المخصصة للسفر إلى الخارج.

وحسب الدورية، اللي توصلات بيها “كود”، فالاعتماد الأساسي ديال الأسفار الشخصية تحدد فـ100 ألف درهم، ويمكن يتزاد باعتماد إضافي كيساوي 30 فالمائة من الضريبة على الدخل المؤداة أو المقتطعة فالسنة اللي فاتت، على أساس ما يفوتش المجموع 500 ألف درهم للشخص الواحد فالسنة. وهاد الإجراء كيشمل المغاربة المقيمين، ومغاربة الخارج، وحتى الأجانب المقيمين بالمغرب.

وأكدات الدورية أن هاد الاعتماد مخصص غير لمصاريف السفر الشخصية، بما فيها تذاكر النقل، الإقامة، ومصاريف العيش، ويمكن يتصرف فيه نقدا، أو عبر شيكات، أو بواسطة بطاقة أداء دولية، مع التنصيص على أن المبلغ اللي كيتسلم نقدا فكل سفر ما خاصوش يفوت 100 ألف درهم.

وبالنسبة للمتقاعدين، سمحات الدورية بالاستفادة من الاعتماد الإضافي اعتمادا على وثيقة كتثبت أداء الضريبة على الدخل فالسنة ديال الإحالة على التقاعد، كما يمكن جمع اعتماد السفر الشخصي مع اعتمادات أخرى مرخص بها، كليا أو جزئيا، فإطار نفس الرحلة.

وفيما يخص الدراسة بالخارج، رفعات التعليمات الجديدة سقف مصاريف الإقامة إلى 15 ألف درهم فالشهر، كتأدى عن طريق تحويلات أو شيكات بنكية، مع إمكانية تجاوز هاد السقف إلى توفرت الوثائق المبررة.

أما العلاج خارج الوطن، فأكدات الدورية أن المصاريف الطبية خاصها تتأدى عبر الأبناك عن طريق تحويلات أو شيكات، مع إلزامية الإدلاء بوثائق الصرف عند المراقبة الجمركية، خصوصا فحالة صرف مبالغ نقدية.

وشددات الإدارة العامة للجمارك على أن أي مبلغ من العملة الصعبة ما تستعملش فالسفر أو تلغات الرحلة، خاص يرجع لسوق الصرف فمدة ما كتفوتش 30 يوم، مع إلغاء العمل بالدورية السابقة لسنة 2022.