كود – كازا  //

لحقاش دازت 30 عام على تأسيسها ، قررات الأوركسترا الفيلارمونية المغربية (OPM) دير  تحدّي كبير واستثنائي هاد العام ، مني غادي تعزف جميع السمفونيات التسعود د الموسيقار العالمي لودفيغ فان بيتهوفن.

هاد المبادرة الفنية كتيجي بالتزامن مع الذكرى المئوية الثانية باش مات ، وكتعتبر خطوة طموحة ورمزية كتقرّب الجمهور المغربي من أكبر  الأعمال الموسيقية الكلاسيكية اللي طبعات تاريخ الموسيقى العالمية.

افتتاح هاد الموسم الاحتفالي غادي يكون بالسيمفونية السابعة، اللي معروفة بإيقاعها القوي وحيويتها الاستثنائية. وغادي تدار جولة موسيقية من 8 حتى لـ 11 أكتوبر فثلاثة د المدن مغربية، وكتنطلق أولى الحفلات فالمسرح الوطني محمد الخامس بالرباط نهار  8 أكتوبر، كتبعها  العروض فمسرح ليرميتاج بكازا نهار  9 و10 أكتوبر، وكتختاتم الجولة فقصر الفنون والثقافة بطنجة نهار  11 أكتوبر.

وقررات الأوركسترا تعطي قيادة هاد الحفلات للمايسترو وعازفة البيانو المغربية دينا بنسعيد، اللي كتمثل الجيل الجديد د الموسيقيين المغاربة.

دينا غادي تعطي نفس جديد لهاد المورصوات، بحكم خبرتها ولمستها الفنية الخاصة اللي كتجمع بين الاحترافية الدولية والارتباط بالصحة الثقافية الوطنية.

هاد الاحتفالية كتعكس المسار الفني للأوركسترا الفيلارمونية المغربية اللي تأسسات عام  1996 ولي قدرات  على مرّ السنين تفرض راسها كمرجع أساسي فالموسيقى السيمفونية بالمغرب.