وكالات//
رجع الأمير هاري، دوق ساسكس، للمملكة المتحدة باش يبدا المرحلة الجاية من الدعوى القضائية ديالو ضد الناشرين ديال جريدة “ديلي ميل”، فمحاكمة متوقّع تكمّل حوالي تسعة ديال السيمانات فالمحكمة العليا فلندن.
هاري كيتّهم مجموعة “أسوشيتد نيوزبيبرز” بجمع معلومات بطريقة غير قانونية، وهاد المجموعة كتشمل جرائد بحال “ديلي ميل” و“ذا ميل أون صنداي” و“ميل أونلاين‘‘.
وقال المتحدّث باسم الأمير لمجلة People باللي هاري “حاس براسو واثق وواجد” يواجه القضية، فحين المجموعة ديال الجرائد نفت هاد الاتهامات بشكل قاطع.
والدعوى كتشمل حتى شخصيات معروفة بحال إلتون جون، وإليزابيث هيرلي، وسادي فروست الزوجة السابقة ديال الممثل جود لو، فاتهامات عندها علاقة بالتجسس على الهواتف وممارسات غير قانونية أخرى.
هاد الفصل القضائي كيكمل سلسلة ديال المعارك القانونية اللي دارها هاري ضد الصحافة البريطانية، وحسب مصدر للمجلة، فالدوق “كيشوف باللي هاد الشي ظلم وخاصو يتصلّح”، وأشار باللي عندو الإمكانيات المادية والإرادة باش يواجه النفوذ الكبير ديال الإعلام الشعبي.
موضوعات أخرى
شركة دالصبابط كتدعي إدارة ترامب. رغم أنها العلامة المفضلة عندو
كاميرون دياز كتصور فيلم جديد فنيويورك.. رجعات بعد غياب عشر سنين
