الرئيسية > آراء > الأمل لي رجع للمغاربة بسباب عملية التلقيح لي غادا مزيان خاصو يتعزز بإجرائات منطقية ديال تخفيف الحجر الصحي هاد الإغلاق مع التمنية بينما النهار كلو الناس بلا كمامة بلا تعقيم بلا وقاية، وهاد التنقل بالرخصة معندو معنى
18/02/2021 15:00 آراء

الأمل لي رجع للمغاربة بسباب عملية التلقيح لي غادا مزيان خاصو يتعزز بإجرائات منطقية ديال تخفيف الحجر الصحي هاد الإغلاق مع التمنية بينما النهار كلو الناس بلا كمامة بلا تعقيم بلا وقاية، وهاد التنقل بالرخصة معندو معنى

الأمل لي رجع للمغاربة بسباب عملية التلقيح لي غادا مزيان خاصو يتعزز بإجرائات منطقية ديال تخفيف الحجر الصحي هاد الإغلاق مع التمنية بينما النهار كلو الناس بلا كمامة بلا تعقيم بلا وقاية، وهاد التنقل بالرخصة معندو معنى

محمد سقراط-كود///

مما لا شك فيه أن تدبير المغرب لأزمة كورونا مشا مخير، وحاليا راه غادي مزيان بزاف بزاف في التلقيح، وحتى أرقام المصابين والموتى طاحت، والأمور غادية للفرج، ولكن في نفس الوقت هاد الإغلاق مع التمنية وهاد التنقل بالرخصة لي في نفس الوقت يمكن تنقل بلا بيها ومايهدر معاك حد، وفي نفس الوقت يقدر يعطيك غرامة أوا باراج كتلاقاه في الطريق، غير هاد العطلة لي دازت كانت إفران مدكوكة بالزوار، وميشليفن مكاينش فين توقف، وجاوها الناس من المغرب كامل وطبعا بلا رخصة بلا مولاي بيه، في نفس الوقت كتسمع شي واحد مشا من لقصر لكبير للعرايش وشدوه خلص غرامة، أو لي كانو داخلين لإفران من جيهة الحاجب خلصو غرامة ولي دخلو من جيهة عين فيتيل لا، تسافر بالطوموبيل يوقفك سبعين باراج تمشي في التران أو الكار مخشي مع خمسين واحد مايسولك تاواحد، المنطق مكاينش نهائيا ماهو حجر صحي مقاد وبصح والتنقل ممنوع إلا برخصة، ما هو رفع للحجر واضح وصريح وبنادم يتنقل فين بغا.

تلاتين واحد كالسين في قهوة النهار كامل مكيعاديوش بعضياتهم حتى كتوصل التمنية عاد كيشد كوفيد المداومة ويبدى خدام كيعادي، كنظن بالمنطق خاص إما يتسدو القهاوي أو يتفتحو ويحتارمو التباعد، ماشي يظلو خدامين وبنادم مريح بلا كمامة إلا أقلية قليلة، ومع التنمية أرى سد كولشي، هذا راه حكم بإعدام إقتصادي على عدة قطاعات غادية غير بزز وهادشي كيزيد يأزمها، أصلا دابا البرد والشتا أغلب المدن كيخواو مع التسعود العشرة راه كيدخل بنادم بحالو، شحال من واحد كيخرج من خدمتو مابين الطاكسيات أو الطوبيس كيلقى راسو تمنية يالله وصل فين ساكن، كيلقى كولشي ساد مكاين حتى منين يجيب خبزة، حيت هذا ماشي الحجر الصحي بنادم كولشي كالس في دارو ساد عليه وداير الإحتياط ديالو، هذا راه بنادم خدام النهار كامل ومطلوق في الأسواق والسوبرمارشيات، والأغلب مادايرش الكمامة والتعقيم نساوه الناس، ولكن مع التمنية أجيو دخلو تنعسو راته كيخرج كورونا.

الأمل لي رجع للمغاربة بسباب عملية التلقيح لي غادا مزيان خاصو يتعزز بإجرائات منطقية ديال تخفيف الحجر الصحي هاد الإغلاق مع التمنية بينما النهار كلو الناس بلا كمامة بلا تعقيم بلا وقاية، وهاد التنقل بالرخصة مع أنه يمكن تمشي حتى لكركارات بلا مايسولك شي حد كما أنه يمكن تفوت بلاكة الربعين في مدينتك ويوقفك أول باراج وتخلص غرامة، الصراحة يقدر يكون للخبراء رأي آخر وبأن هاد الإغلاق مع التمنية كيجنب البلاد تفشي زايد نغزة لكورونا، ولكن هاديك رخصة التنقل لي خاصك مسطرة باش تشدها وفي نفس الوقت يمكن تسافر بلا بيها راه غير منطقي هادشي، كيخلي الواحد في حيص بيص ماعارف يديه من رجليه.

موضوعات أخرى

24/02/2021 19:30

ضروري من إلغاء القوانين اللي كتجرم المثلية وحماية هاد الفئة من العنف الأسري والمجتمعي.. تقرير كحل على أوضاء المثليين فالمغرب فزمان كورونا: تضررو بزاف بسباب حملات التشهير اللي تزامنات مع الحجر الصحي

24/02/2021 18:30

روبرتاج. عصابات “الابتزاز” مازالة فواد زم.. بعد ما طاح رونار ضحية ليهم خبراء وفاعلين حللو الظاهرة عبر “كود”: هاد الجرائم من الصعب القضاء عليها حيت سرية.. وسببها الفقر اللي كيعيشوه ولاد المنطقة