سهام البارودي – كود//
واحد التقرير قريتو ديال الجمعية المغربية لوقاية الفم و الاسنان كايقول بلي اكثر من تسعين فلميا من المغاربة كايعانيو من السّوسة و هادشي كايقيس حتى المراهقين و الأطفال و تقريبا ثلت المغاربة ماعمرهم شافو طبيب ديال الاسنان فحياتهم.
ماشفتش الاسباب فالتقرير و لكن راها باينة زعما مامحتاجينش الجمعية المغربية تقولينا بلي الزلط و غياب التغطية الصحية و غلاء ثمن الفحوصات و الاستشارات الطبية هوا أول سبب علاش المغاربة ماكايعتانيوش بصحة الاسنان ديالهم. و لكن بلاتي، من غير هاد الاسباب المادية كاين واحد السبب ثقافي عميق و مهم بزاف، المغربي راه كايشوف الاسنان شي حاجة ثانوية و ثقافة العناية بيها شي حاجة جديدة، دابا دابا ف2024 كاينين ناس ماعندهمش شيتة د السنان و لاعندو يقدر يحك بيها من العيد للعيد..ثقافة فرشاة الاسنان و المعجون و حك سنانك مورا كل وجبة راه ماعندش كلشي اما الخيط د السنان هاداك لاقلتيها لشي حد يقوليك مالي ساكن فكاليفورنيا !
المغاربة ماكايشوفوش الاسنان شي حاجة مهمة و داكشي علاش يقدر يحيد ضرسة فالسوق وسط شي قيطون بكلاّب و ماعندوش مشكل و داكشي علاش شحال من مغربي واخا يطيحو فيديه الفلوس غايفضل يشري حولي صردي بميات الف و لا مياوخمسين الف ريال و مايمشيش يصايب سنانو و يعالجهم !
فالعيد الكبير شحال من واحد كايقوليك باغي يشري حولي باش يفرح الوليدات و قليل لي كايقوليه راسو دوك فلوس الحولي سير عالج بيهم سنان ولدك و لا بنتك و خلص عليه التقويم باش يكبر سنانو مقادين و زوينين مايعقدوهش فحياتو لابغيتي بصح تفرحو عوض انك تشري حولي غايسالي فالمجاري الصحية.
باغي نفرح الوليدات وا شد شي ميات الف و سير خسرها على التطبيب ديال ولدك و لا بنتك و دور بيه و دور بفمو و اسنانو باش نهار يكبر يلقاهم ماشي يطيحو ليه على خمسة و عشرين عام.
حتى فالتصاور ديال السياح فاش كايتصورو مع ولاد البلاد كاتبان ليك الميزيريا فالوجوه غا بسباب غياب الاسنان و التسوس ديالها و قلة العناية بيها.
