كود سبور//

عبرو لاعبين المنتخب الوطني المغربي لأقل من 17 عام، على الرغبة ديالهم فتحقيق نتيجة إيجابية فأول ماتش لهم فمونديال أندونيسياU17، اللي غيلعبوه غدا الجمعة ضد منتخب باناما، وأنهم باغيين يشرفو المغرب فهاد التظاهرة ويفرحو الجماهير المغربية.

وخلال الحصة التدريبية الأخيرة قبل الماتش ضد باناما، قال لاعب المنتخب الوطني المغربي لأقل منU17، أيمن النائر فتصريح للموقع الرسمي للجامعة الملكية المغربية لكرة القدم: “ماتش غدا غيكون صعيب ولكن أنا تايق فصحابي ومن شحال هادي وحنا كنوجدو لهاد المباراة وديما الرباح فالمباراة الأولى كيعطيك حافز باش تمشي فالمسابقة مزيان وإنشاء الله يكون غير الخير ونربحو 3 بوان وراه وجدنا فأجواء زوينة وعائلية”.

لاعب ليكيب ناسيونال محمد أمين كتيبة حتى هو قال: “حنا بدينا الخدمة من شحال هادي، حققنا إنجاز فكأس العرب وإنجاز فكأس إفريقيا، ودابا جينا لاكوب ديموند باش نحققو نتيجة إيجابية اللي تليق بصورة المنتخب الوطني المغربي”.

وأكد كتيبة: “وجدنا بما فيه الكفاية لهاد المسابقة وكنتمناو نحققو شي إنجاز يليق بالمغرب، وأن الجمهور يدير فينا الثقة كاملة وكنتسناو المساندة ديالهم الكبيرة اللي كيخلق لنا حافز كبير باش نديرو نتيجة إيجابية فماتش غدا ضد باناما”.