كود سبور//

عبرو لاعبين المنتخب الوطني المغربي لأقل من 17 عام، على الفرحة ديالهم حيث ربحو منتخب جنوب إفريقيا، وتأهلو للدومي فينال، وأكدو أنهم معولين يريحو كأس إفريقيا ويفرحو المغاربة.

وهضر زياد باها نجم ماتش المغرب ضد جنوب إفريقيا، واللي ماركا 2 أهداف من أصل 3 ربح به المنتخب المغربي مقابل واحد لجنوب إفريقيا، وقال ورا المباراة فتصريح له: المغرب هو كلشي عندي وباغي ندير أي حاجة باش نربحو كأس أفريقيا ونفرحو المغاربة اللي ديما كايشجعونا”.

اما براهيم الرباج أو ميسي المغرب وتشيلسي كيفما يلقب، فقال فتصريح له: “كانشكر المغاربة كاملين حيث شجعونا وغانوجدو دابا للدومي فينال باش ندوزو للنهائي ونربحو الكأس ويبقى فالمغرب ونفرحو الجمهور المغربي كلو”.

وهضر حيداوي حتى هو فتصريح له وقال: “شاركنا مع رئيس الجامعة الملكية المغربية لكرة القدم فرحة التأهل للدومي فينال، وكايقولينا ديرو اللي عليكم وخليو الباقي عليا باش نربحو كأس أفريقيا ونفرحو المغاربة”.