كود سبور//

عبرو لاعبين المنتخب الوطني المغربي لاقل من 17 عام، على الرغبة ديالهم فتحقيق الفوز على إندونيسيا مستضيفة مونديال U17، فماتش المنتخبين غدا الخميس ضمن الجولة الثالثة من دور المجموعات، واكدو انهم غيتقاتلو باش يتأهلو للدور الثاني ويفرحو المغاربة.

وتحدث لاعب المنتخب المغربي سيف الدين شلاغمو فتصرح للموقع الرسمي ديال الجامعة الملكية المغربية لكرة القدم، وقال: “الماتش ضد أندونيسا ما غيكونش ساهل وكيف كنعرفو هو صاحب الأرض والجمهور وغتكون عندو مساندة جماهيرية ولكن حنا مولفين على ضغط الجماهير كيفما كنا لعبنا لاكوب دافريك، حنا موجدين مزيان وغنتقاتلو باش نتأهلو لثمن النهائي ونفرحو الجمهور المغربي”.

محمد امين كتيبة حتى اكد رغبة الأشبال فتحقيق الرباح على إندونيسيا ومعه التأهل للدور الثاني من المونديال، وقال: “الماتش ديال غدا موجدين له مزيان، دابا نسينا المباراة ديال الإكوادور وقدامنا ماتش إندونيسيا اللي خاصنا نحققو فيه نتيجة ايجابية باش تضمنو التأهل للدور الثاني وكنتمنى الجمهور المغربي يعطينا الدعم ديالو كامل ويساندنا باش نقولو الكلمة ديالنا فهاد البطولة”.