كود سبور//

عبر لاعبو المنتخب الوطني المغربي لاقل من 20 عام، على الفرحة ديالهم بالتأهل إلى ربع نهائي كاس افريقيا U20 المقام بمصر، بعدما تصدرو الگروب الثاني برصيد 7 نقاط، جمعوها من رباح على كينيا وتعادل مع نيجريا ورباح اليوم الاربعاء على تونس بـ3 لواحد، واكدو انهم غايوجو باش يربحو ربع النهائي ويتأهلو للدومي فينال وكاس العالم.

وهضر معاد الضحاك لاعب المنتخب المغربي لاقل من 20 عام، بعد ماتش المغرب وتونس، وقال فتصريح للموقع الرسمي للجامعة الملكية المغربية لكرة القدم: “كان هدفنا هو نربحو اكبر عدد من الماتشات ونتأهلو لربع النهائي، ودابا تصدرنا المجموعة واللاعبين والصطاف فرحانين، غانفرحو شويا دابا فلوطيل وهذا الشي نورمال، وغادي نوجدو للماتش اللي جاي باش نتأهلو للدومي فينال ونتأهلو للمونديال”.

امين بوكامير لاعب المنتخب المغربي لاقل من 20 عام، حتى هو هضر وقال: “رباح مستحق، حنا ما جيناش هنا باش نتعادلو ونتأهلو، لا حنا المغرب وخاصنا نربحو گاع الماتشات وجينا هنا بعقلية الرباح، وربحنا وتأهلنا وعندنا دابا 5 ايام باش نوجدو لربع النهائي ونربحوه”.